गृहमन्त्री बालकृष्ण खाँणले कर्णाली प्रदेशका मुगु, कालिकोट र हुम्लामा बाढी र पहिरोबाट घाइते भएकाको उद्धार तत्काल गर्न गृह प्रशासन, सम्बन्धित जिल्ला प्रशासन र सुरक्षा निकायलाई निर्देशन दिएका छन् ।
गृहमन्त्री खाँणले तत्कालका लागि जिल्लामा रहेको स्रोतसाधनको उपयोग गरेर घाइतेको उद्धार, उपचार र पुनःस्थापना गर्नुपर्ने भए पुनःस्थापना गर्न र थप स्रोतसाधनको आवश्यकता पर्ने भए मन्त्रालयमा लेखी पठाउन निर्देशन दिए ।
गृहसचिव विनोदप्रकाश सिंह, मन्त्रालयका सुरक्षा समन्वय महाशाखा प्रमुख फणिन्द्रमणि पोखरेल, नेपाल प्रहरीका कर्णाली प्रदेशका प्रमुख प्रहरी नायब महानिरीक्षक पोषराज पोखरेल र सम्बन्धित जिल्लाका प्रमुख जिल्ला अधिकारीलाई गृहमन्त्री खाँणले निर्देशन दिए ।
उनले सरकारको मुख्य दायित्व नागरिकको जीवन रक्षा भएकाले संवेदनशील भएर विपद् प्रभावितको उद्धार र उपचारमा लाग्न पनि भनेका छन्
मुगुको छायाँनाथ रारा नगरपालिका–११ सालिममा मानबहादुर कुमाईको घर पुरिँदा ५ जनाको शव प्राप्त भएको र ११ जना बेपत्ता भएका खबर आएपछि नेपाल प्रहरी, सशस्त्र प्रहरी बल र नेपाली सेनाको टोली घटनास्थलतर्फ गएको प्रमुख जिल्ला अधिकारी रोमबहादुर महतले जानकारी दिए ।
सुरक्षा टोली घटनास्थलमा पुग्न पनि ठाउँठाउँमा पहिरो गएकाले अप्ठ्यारो परिरहेको र केहीबेरमा पुग्ने जानकारी आफूले पाएको उनले बताए ।
कालिकोटको तिलगुफा नगरपालिका–४ राचुलीमा मलामीहरूले लासु जलाइरहेको अवस्थामा माथिबाट आएको पहिरोले पुर्दा १३ जना बेपत्ता भएको खबर आएको र सुरक्षाकर्मीको टोली घटनास्थलमा पुगिसकेको नेपाल प्रहरीका कर्णाली प्रदेश प्रमुख डीआईजी पोखरेलले जानकारी दिए ।
सुरक्षाकर्मीले बेपत्ताहरूको खोजी कार्य जारी राखेको, पहिरो तिला नदीसम्म पुगेको उनले बताए ।
हुम्लाको चखेली गाउँपालिका–६ मेलथममा मानवीर विकको घर पहिरोले बगाउँदा ९ जना पुरिएकोमा ४ जनाको मृत्यु भएको र ५ जनाको जीवितै उद्धार गरिएको डीआईजी पोखरेलले बताए । घाइतेहरूलाई थप उपचारका लागि नेपालगञ्ज लैजान हेलिकोप्टर घटनास्थलमा लैजाने तयारी भइरहेको डीआईजी पोखरेलले बताए ।








































