नेकपा एमालेका सचिव योगेश भट्टराईले प्रतिनिधि सभा सदस्यको हैसियतमा प्राप्त सबै सामग्री फिर्ता गरेका छन् । शनिवार राति १२ बजेबाट २०७४ सालको निर्वाचनबाट गठन भएको प्रतिनिधि सभाको कार्यकाल सकिएपछि उनले आइतवार आफूले सांसदको हैसियतमा प्राप्त गरेको सबै सामग्री फिर्ता गरेका हुन् ।
‘सांसद निर्वाचित भएपछि उहाँले प्रयोग गर्नु भएको रातो पासपोर्ट, संसदको लोगोसहित संसद् सचिवालयमा बरबुजारत गर्नु पर्ने सबै सामग्रीहरू आजकै मितिमा फिर्ता गर्नु भएको छ’, उनको सचिवालयले भनेको छ ।
उनी २०७४ सालमा प्रतिनिधिसभाको निर्वाचनमा ताप्लेजुङ जिल्लाबाट २९ हजार ४७९ मत प्राप्त गरी विजयी बनेका थिए । उनले सांसदको हैसियतमा पाएको रातो पासपोर्ट समेत फिर्ता गरेको उनको सचिवालयले जनाएको छ ।
भट्टराई यस अवधिमा भएको जम्मा ३१८ बैठकमध्ये २६५ वटामा उपस्थित भएको उनको सचिवालयले जानकारी दिएको छ । ‘५ वर्षे अवधिमा संसदमा कुल ३१८ वटा बैठकहरू बसेका रहेछन्, जसमध्ये उहाँ २६५ वटा बैठकमा उपस्थित रहनु भएको थियो । पार्टी कामको शिलशिला, विदेशका कार्यक्रमहरू र भौगोलिक रूपमा विकट निर्वाचन क्षेत्र भएका कारण केही बैठकहरूमा उहाँ अनुपस्थित हुनु भएको हो’, उनको सचिवालयले भन्यो ।








































