रुसको सरकारी ग्यास कम्पनी गाजप्रोमले चीन र मंगोलियालाई ग्यास दिनका लागि सोयुज भोस्तोक पाइपलाइन निर्माण गर्ने भएको छ ।
यसको जानकारी रुसका राष्ट्रपति भ्लादिमिर पुटिनले शांघाई कोअपरेसन अर्गनाइजेसनको शिखर बैठकमा दिएका हुन् ।
बैठकको साइडलाइनमा उनले चीनका राष्ट्रपति सी चिनपिङ र मंगोलियाका राष्ट्रपति उख्नागीन खुरेलसुखसँग कुराकानी गरेका थिए ।
ऊर्जा क्षेत्रमा बेइजिङ र उलानबाटरसँग सहकार्य गर्न मस्को तयार रहेको पुटिनले बताए । दुई देशबीच सीमापार विद्युत् आपूर्ति बढाउने सम्भाव्यतामा पनि कुराकानी भएको छ ।
‘यो वर्ष रुसले चीन र मंगोलियालाई दिने ऊर्जामा २० प्रतिशत वृद्धि हुने अनुमान गर्छौं,’ पुटिनले बताए, ‘त्यो भनेको ५.२ अर्ब किलोवाटसम्म हो ।’








































