काठमाडौं, आइतबार, १५ जेठ २०७९ । आइतबार बिहानदेखि सम्पर्कविहीन तारा एयरको विमानमा गोरखाका एकै परिवारका चार जना सवार रहेको पाइएको छ। बिहान ९ बजेर ५५ मिनेटमा पोखराबाट जोमसोमका लागि उडेको तारा एयरको ट्विनटर विमान करिब १०:१० पछि सम्पर्कविहीन भएको विमानमा उनीहरू सवार रहेको पाइएको हो ।
जहाजमा १९ यात्रु र चालक दलका तीन सदस्यसहित २२ जना सवार रहेकोमा गोरखाको शहिद लखन गाउँपालिका वडा नम्बर ५ तीनमानेका एकै परिवारका चार जना भएको वडाध्यक्ष यमबहादुर रानामगरले जानकारी दिनुभयो । ‘विमान बेपत्ता भएको सुनिएको छ। विमानमा रहेकामध्ये ४ जना यसै गाउँपालिकाका एकै परिवारका सदस्य हुन्,’ वडाध्यक्ष रानामगरले भन्नुभयो, ‘हिजो मात्रै उहाँहरू मुस्ताङ जाने भनेर पोखरा गएका रहेछन् । चारै जनाको मोबाइलको स्विच अफ छ।’
वडाध्यक्ष रानामगरका अनुसार बुबा गणेशनारायण श्रेष्ठ, आमा रश्मि श्रेष्ठका साथै दुई छोरी रोजिना र रविना बेपत्ता विमानमा सवार थिए । उहाँहरूले पोखरा हुँदै मुस्ताङ जाने खबर आफन्तलाई जानकारी गराएका थिए । ‘५ जनाको परिवार थियो। दुई छोरीहरु रविना र रोजिना वैशाख ३० गते मात्रै अमेरिकाबाट आएका थिए,’ रानामगरले भन्नुभयो, ‘अर्का छोरा पनि अमेरिकामा नै छन् ।’
भर्खरै सम्पन्न स्थानीय निर्वाचनमा आफू वडाध्यक्षमा निर्वाचित भएपछि गणेशले फोन गरेर बधाई दिएको समेत रानामगरले स्मरण गराउनु भयो ‘छोरीहरुलाई घुमाउन लैजानु छ भनेर उनी हिजो मात्रै पोखरा गएका थिए,’ रानामगरले भन्नुभयो ।
तारा एयरले विमान खोजी कार्य जारी रहेको बताएको छ ।
तर, नेपाल वायुसेवा प्रदायक संघका प्रवक्ता योगराज कँडेलले भने तारा एयरको ९एन- एइटी साइनको ट्विनअटर जहाज लार्जुङ क्षेत्रमा ‘लोकेट’ भएको जानकारी दिएका छन् ।








































