काठमाडौं, मंगलबार, १० जेठ २०७९ । स्थानीय तह निर्वाचनको मतगणना अन्तिम चरणमा पुगेको छ । सोमबार रातिसम्मको मतगणना अनुसार अब १९ पालिकाको मात्र नतिजा आउन बाँकी छ । हालसम्म ७ सय ३४ पालिकाको अन्तिम नतिजा सार्वजनिक भइसकेको छ ।
हालसम्म घोषित नतिजा अनुसार, नेपाली कांग्रेसले ३ सय २१ पालिकाको प्रमुखमा जित हासिल गरेको छ । २ सय ९५ पालिकाको उपप्रमुख पद पनि कांग्रेसले आफ्नो पक्षमा पारेको छ । कांग्रेस अझै ४ पालिकाको प्रमुख र ३ पालिकाको उपप्रमुख पदमा अगाडि छ । यसपटकको स्थानीय तह निर्वाचनमा कांग्रेस सबैभन्दा ठुलो दल बनेको छ । २०७४ सालको स्थानीय निकाय निर्वाचनमा सबैभन्दा ठुलो दलको पगरी गुथेको नेकपा एमाले भने यसपटक दोस्रो स्थानमा खस्किएको छ ।
एमालेले हालसम्म २ सय पालिकाको प्रमुख पद जितेको छ । २ सय ३० पालिकाको उपप्रमुख पद पनि एमालेले जितेको छ । एमाले हाल ५ पालिकाको प्रमुख र १० पालिकाको उपप्रमुख पदमा अगाडि देखिएको छ ।
यसैगरी नेकपा माओवादी केन्द्रले हालसम्म १ सय २० पालिकाको प्रमुख पदमा जित हासिल गरेको छ । माओवादी केन्द्रले १ सय २८ पालिकाको उपप्रमुख पद पनि जितेको छ । हाल माओवादी केन्द्र २ पालिकाको प्रमुख र १ पालिकाको उपप्रमुख पदमा अगाडि रहेको छ । यसपटकको निर्वाचनमा माओवादी केन्द्र तेस्रो ठुलो दल बनेको छ ।
यसैगरी जनता समाजवादी पार्टी (जसपा) ले २९ पालिकाको प्रमुख र ३० पालिकाको उपप्रमुख पदमा सफलता हात पारेको छ । जसपा हाल २ पालिकाको प्रमुख र ३ पालिकाको उपप्रमुख पदमा अगाडि देखिएको छ ।
नेकपा एकीकृत समाजवादीले भने हालसम्म १८ पालिकाको प्रमुख र २१ पालिकाको उपप्रमुख पदमा जित हात पारेको छ । हाल एकीकृत समाजवादी १ पालिकाको प्रमुख पदमा अगाडि छ । पोखरा महानगरपालिकाको मेयर पदमा एकीकृत समाजवादी जिततर्फ अग्रसर देखिएको छ ।
नेकपा एमालेबाट विभाजित भएर बनेको दल एकीकृत समाजवादीले पहिलो पटक स्थानीय तहको निर्वाचनमा सहभागिता जनाएको हो । पहिलो सहभागितामै एकीकृत समाजवादीले महत्वपूर्ण सफलता हात पारेको हो ।
यसअघि एकीकृत समाजवादीले हेटौँडा उपमहानगरपालिकाको प्रमुख पद जितिसकेको छ । अघिल्लो पटकको स्थानीय तह निर्वाचनमा पोखरा र काठमाडौं महानगरको मेयरमा विजयी भएको एमाले भने यसपटक कुनै पनि महानगरमा जित हात पार्ने सम्भावना देखिएको छैन ।
यसपटकको स्थानीय तह निर्वाचनमा सत्तारुढ गठबन्धन दल कांग्रेस, माओवादी केन्द्र, एकीकृत समाजवादी, जसपा र राष्ट्रिय जनमोर्चाले चुनावी तालमेल गरेका थिए । राष्ट्रिय जनमोर्चाले पनि ४ पालिकाको प्रमुख र ३ पालिकाको उपप्रमुखमा जित हासिल गरेको छ ।
यसैगरी लोकतान्त्रिक समाजवादी पार्टी (लोसपा)ले १५ पालिकाको प्रमुख र ११ पालिकाको उपप्रमुख पद जितेको छ । लोसपा हाल २ पालिकाको प्रमुख र १ पालिकाको उपप्रमुख पदमा अगाडि छ । राष्ट्रिय प्रजातन्त्र पार्टी (राप्रपा)ले ४ पालिकाको प्रमुख र ४ पालिकाको उपप्रमुख पद जितेको छ ।
यसैगरी सीके राउतको जनमत पार्टीले २ पालिकाको प्रमुख र १ पालिकाको उपप्रमुख पद जितेको छ । नागरिक उन्मुक्ति पार्टीले ४ पालिकाको प्रमुख र ३ पालिकाको उपप्रमुख पद जितेको छ । नेपाल मजदुर किसान पार्टी, जनता प्रगतिशील पार्टी र तमलोपाले पनि १÷१ पालिकाको प्रमुख पद जितेका छन् ।
यसपटक स्वतन्त्र उम्मेदवारले भने १२ पालिकाको प्रमुख पद र ४ पालिकाको उपप्रमुख पदमा जित हासिल गरेका छन् । हाल १ पालिका (काठमाडौं महानगर) को प्रमुख पदमा स्वतन्त्र उम्मेदवार अगाडि छन् । काठमाडौंमा स्वतन्त्र उम्मेदवार वालेन्द्र साहको जित लगभग निश्चित देखिएको छ ।








































