‘रुसले चीनसँग सैन्य तथा आर्थिक सहयोग मागिरहेको छ’

रुसले युक्रेनमाथिको जारी आक्रमणका लागि चीनसँग सैन्य र आर्थिक सहयोग माग गरेको अमेरिकी अधिकारीले बताएका छन् ।

फाइनान्सियल टाइम्स र न्यूयोर्क टाइम्ससहितका पत्रिकाले अमेरिकी अधिकारीलाई उद्धृत गर्दै रुसले चीनसँग सैन्य तथा आर्थिक सहयोगको माग गरिरहेको दाबीसहितको खबर प्रकाशित गरेका हुन् ।

गएको फेब्रुअरी २४ मा राष्ट्रपति भ्लादिमिर पुटिनको आदेशमा रुसले युक्रेनमाथि आक्रमण थालेको हो । १८ दिन बित्दा पनि युद्ध जारी छ । जारी युद्धमा रुसी सैनिकले युक्रेनी भूमिमा त्यहाँका सैनिक तथा स्वयम् सेवकबाट कडा प्रतिरक्षाको सामना गरेका छन् ।

मस्को (रुस)ले युक्रेनमा प्रयोग गर्नका लागि बेइजिङ (चीन) बाट सैन्य सामग्री सहयोग माग गरेको फाइनान्सियल टाइम्समा प्रकाशित खबरमा उल्लेख छ ।

नाम नखुलाइएका अमेरिकी अधिकारीलाई उद्धृत गर्दै पत्रिकामा प्रकाशित खबरमा रुसले युक्रेनमाथि आक्रमण सुर गरेदेखि नै चीनसँग सैन्य सहयोग माग गरेको दाबी गरिएको छ ।

अमेरिकी अधिकारीले रुसले चीनसँग कस्ता हतियार वा सैन्य सामग्री माग गरिरहेको छ भन्ने खुलाएका भने छैनन् । चीनले सहयोगका लागि तयारी गरिरहेको हुन सक्ने शंकेत समेत रहेको खबरमा दाबी गरिएको छ ।

यस्तै न्यूयोर्क टाइम्समा प्रकाशित भएको अर्को खबरमा अमेरिकी अधिकारीलाई नै उद्धृत गर्दै पश्चिमा देशले लगाएको आर्थिक प्रतिबन्धको प्रभाव कम गर्नका लागि रुसले चीनसँग आर्थिक सहयोग पनि माग गरेको उल्लेख छ ।

चीनले अहिलेसम्म रुस–युक्रेन युद्धमा तटस्थ बस्ने प्रयास गरिरहेको छ र उसले रुसी आक्रमणको निन्दा गरेको छैन ।

यसैबीच अमेरिकामा चिनियाँ दूतावासका प्रवक्ताले रुसको आग्रहबारे सोधिएको प्रश्नमा चीनको प्राथमिकता युक्रेनमा जारी युद्ध ‘नियन्त्रण भन्दा बाहिर’ जान नदिनेमा रहेको बताएका छन् ।

प्रवक्ताले रुसले सैन्य तथा आर्थिक सहयोग माग गरेका बारेमा आफूले नसुनेको बताए। युद्धमा रुसलाई सहयोग गर्ने कदम चालेमा गम्भीर परिणामको सामना गर्नु पर्ने अमेरिकाले चेतावनी दिँदै आएको छ ।