बार्सिलोनाको लगातार चौथो जित

काठमाडौं । फेरान टोरेसको दुई गोलप्रेरित बार्सिलोनाले आइतबार राति स्पेनिस ला लिगामा ओसासुनामाथि ४–० को सहज विजय हासिल गरेको छ । लिगमा बार्सिलोनाको यो लगातार चौथो जित हो । 

म्यानचेस्टर सिटीका पूर्व स्ट्राइकर टोरेसले १४औं मिनेटमा पेनाल्टीमा गरेको गोलबाट बार्सिलोनाले अग्रता लिएको थियो । २१औं मिनेटमा टोरेसले घरेलु टोलीको अग्रता दोब्बर बनाए । टोरेसले औसमाने डेम्बेलेको पासमा गोल गरेका हुन् । डेम्बेलेकै पासमा पिइरे–इमेरिक औबमेयाङले अर्को गोल थपे । 

आर्सनलका पूर्व कप्तान औबमेयाङ बार्सिलोना आएपछि ६ लिग खेलमा यो पाँचौं गोल हो । २१औं शताब्तीमा बार्सिलोनाबाट चाँडो पाँच गोल गर्नेमा औबमेयाङ दोस्रो खेलाडी बन्न सफल छन् । २००४ मा सामुयल इटो र २००५ मा ज्लाटन इब्राहिमोभिच चाँडो पाँच गोल गर्नेमा शीर्ष स्थानमा छन् ।  

खेल सकिन १५ मिनेट बाँकी हुँदा रिकुई पुइगले अर्को गोल थपेपछि बार्सिलोना सहजै तीन अंक जोड्न सफल भएको हो । 

जितसँगै बार्सिलोनाले २७ खेलबाट ५१ अंक जोडेको छ । जुन दोस्रो स्थानको सेभियाभन्दा पाँच अंक र शीर्ष स्थानको रियाल मड्रिडभन्दा १२ अंकले पछाडि हो । तर, सेभियाले एक खेल बढी खेलेको छ । पराजित ओसासुना ३५ अंकका साथ ११औं स्थानमा छ ।