काठमाडौँ, शनिबार, ८ माघ २०७८ । नेपाली राष्ट्रिय क्रिकेट टोलीका नवनियुक्त कप्तान सन्दीप लामिछाने स्वदेश फर्किएका छन् । अष्ट्रेलियामा जारी बिग ब्यास लिग खेलेर कप्तान लामिछाने शुक्रबार राती त्रिभुवन विमानस्थलमा अवतरण गरेका हुन् ।
अघिल्लो महिना नेपाल क्रिकेट संघ (क्यान)ले ज्ञानेन्द्र मल्ललाई अनुशासनको कारण देखाउँदै पदमुक्त गर्दा सन्दीपलाई कप्तानीमा नियुक्त गरेको थियो । आगामी महिना ओमानमा हुने आईसीसी पुरूष टी–२० विश्वकप ग्लोबल छनोटका लागि सन्दीपको कप्तानीमा १६ सदस्य टोली घोषणा भइसकेको छ ।
अब सन्दीप केही दिन विश्रामपछि पिसिआर परिक्षण लगायत प्रक्रिया पूरा गरेर प्रशिक्षण क्याम्पमा सहभागी हुनेछन् ।
स्वदेश फर्किएपछि कप्तानको रूपमा पहिलो सार्वजनिक अभिव्यक्ति दिएका सन्दीपले राष्ट्रिय टोलीका लागि सबैले एकजुट भएर खेल्ने प्रतिबद्धता जनाएका छन्। परिवारभित्र देखिएको विवाद परिवारभित्रै सल्टिएको देख्दा खुसी लागेको बताउँदै उनले टिममा आफूलाई सहकार्य गर्न कुनै कठिनाई नहुने उल्लेख गरे ।
- ADVERTISEMENT -
