काठमाडौँ, शुक्रबार, २ पौष २०७८ । नेपाली कांग्रेसको १४ औं महाधिवेशनको नयाँ नेतृत्व चयनका लागि भएको निर्वाचनबाट मुस्लिम सहमहामन्त्रीमा फरमुल्लाह मन्सुर निर्वाचित भएका छन् ।
सभापति शेरबहादुर देउवा समूहका मन्सुरले शुक्रबार भएको मतगणनामा शेखर कोइराला समूहका शेख वकिललाई पराजित गरेका हुन् । मन्सुर २७७६ मत ल्याएर विजयी भएका हुन् भने वकिलले १८७१ मत ल्याएका छन् ।
कांग्रेसका महामन्त्री पदको आठ क्लष्टरमध्ये तीनको बिहिबार मत परिणाम आइसकेकाले आज बाँकी पाँच क्लस्टरको मतगणना भइरहेको हो । कांग्रेस सहमहामन्त्रीमा आठ जना निर्वाचित हुने व्यवस्था छ ।
महिला, दलित र आदिवासी जनजाति क्लष्टरको सहमहामन्त्री पदको मत परिणाम अनुसार महिलातर्फ सहमहामन्त्रीमा महालक्ष्मी उपाध्याय ‘डिना’, दलिततर्फ सहमहामन्त्री जीवन परियार र आदिवासी जनजाति सहमहामन्त्रीमा भीष्मराज आङ्दाम्बे निर्वाचित भएका थिए ।








































