काठमाडौं । नेपाली कांग्रेसको १४ औं महाधिवेशन अन्तर्गत काठमाडौंको कागेश्वरी-मनहरा नगर सभापतिमा उद्धव दाहाल विजयी भएका छन् ।
शनिबार भएको नगर अधिवेशनबाट दाहाल सभापतिमा निर्वाचित भएका हुन्। संस्थापन समूहनिकट दाहालले १५१ मत पाए भने अर्का प्रत्यासी मिठ्ठाराम दाहालले १३८ मत पाए । सभापतिमा पराजित दाहाल कांग्रेस नेता प्रकाशमान सिंह निकट हुन् ।
काठमाडौं जिल्लाका एक महानगरपालिका र ९ नगरपालिकामा शनिबार अधिवेशन भएको हो । अधिकांश पालिकामा निर्वाचनबाटै नेतृत्व चयन भएका छन्।
मंसिर ९–१३ सम्मका लागि तोकिएको केन्द्रीय महाधिवेशन अन्तर्गत कांग्रेसमा स्थानीय अधिवेशन भएका छन्।
हिमाली जिल्लामा जिल्ला अधिवेशन भइरहेका छन् भने पहाडी र तराईका जिल्लामा पालिका अधिवेशन भएका हुन्। प्रदेश दुईका ८ सहित १३ जिल्लामा वडा अधिवेशन सुरु हुन सकेको छैन ।








































