सिन्धुली, ११ भाद्र २०७८ । गएराती देखिको अविरल वर्षाले सिन्धुलीका मुख्य र ग्रामीण सडक अबरुद्ध भएका छन । ठाँउ ठाँउमा पहिरो जाँदा स्थानीयका घरहरु समेत जोखिममा परेका छन ।
काठमाडौं जोडने बिपि राजमार्गको बर्दिवास–सिन्धुली खण्डअन्तर्गत भिमान क्षेत्रका खहरेहरूमा आएको बाढीले ढुंगासहितको चोकर थुपार्दा राजमार्ग अवरुद्ध बनेको जिल्ला प्रहरी कार्यालय सिन्धुलीले जनाएको छ ।
बीपी राजमार्गका ठाँउ ठाँउका खहरेहरूमा बाढीले ल्याएको गेगरका कारण आज बिहानदेखि सडक अवरुद्ध भएको प्रहरीको भनाइ छ । बिपि राजमार्गको फिटिङ्ग क्षेत्रमा रुख सहितको पहिरो खसेर राजमार्ग अबरुद्ध भएकाले रुख काटने मेसिन सहित अहिले प्रहरी परिचालन गरिएको सिन्धुली प्रहरीका प्रबक्ता डिएसपी मनोज लामाले जानकारी दिए ।
डिएसपी लामाका अनुसार कमलामाइ नपा ४ र ७ का केही स्थानीयका घर पहिरोका कारण जोखिममा परेको छ । ४ नम्बर वडाको चिसापानी झोरा र ७ नम्बर वडाका केहि स्थानीयको घर माथी बाट पहिरो खस्दा जोखिममा परेको प्रहरीले बताएको छ ।
जिल्ला स्थित खोला निकट क्षेत्रका केही बस्ती समेत बाढीका कारण जोखिममा परेको सूचना पाएपछि आज बिहानैदेखि प्रहरी परिचालन गरिएको जिल्ला प्रहरी कार्यालय सिन्धुलीले जनाएको छ । बीपी राजमार्गमा आधा दर्जन बढी ठाँउमा खहरे पर्छन ।
प्रहरीका अनुसार ती सबैमा खहरेमा बाढि आएकाले यातायात संचालनमा समस्या भएको छ । बाढीले सडकमै चोकर र बालुवा थुपारेका कारण साना ठुला सबै सवारीलाई गुड्न समस्या पारेको छ । अहिले सडक अबरुद्ध छ । अहिले दुईटा मेसिन मार्फत चोकर हटाउने काम भइरहेको जिल्ला प्रहरी कार्यालय सिन्धुलीले जनाएको छ ।
उता मध्यपहाडी लोकमार्गको खुर्कोट–घुर्मी खण्ड पनि अहिले अवरुद्ध छ । गोलन्जोर र फिक्कल गाउँपालिकामा आधा दर्जनभन्दा बढी ठाउँमा सानाठूला पहिरो खसेर कारण लोकमार्ग अवरुद्ध बनेको स्थानीयले जानकारी दिएका छन ।
यता मदन भण्डारी राजमार्गको सिन्धुलीमाडी–हरिहरपुरगढी खण्डमा समेत पहिरो खस्दा सडक अवरुद्ध बनेको छ । निरन्तर बर्षाले हरिहरपुर गढी स्थित हाक्पारा नेर पहिरो खसेकाले उक्त सडक अवरुद्ध भएको हो ।
प्रहरी प्रवक्ता लामाले नागरिक खबरलाई सिन्धुलीको बर्षा बारे प्रतिक्रिया दिंदै भने, “अहिलेसम्म मानवीय क्षतीको खबर छैन तर तीन वटै राजमार्ग भने अबरुद्ध छन ।”








































