काठमाडौं, ४ भाद्र २०७८ । प्रस्तावित नेपाल सहकारी बैंकको सम्पर्क कार्यालय मध्येबानेश्वरमा सञ्चालनमा आएको छ । शुक्रबार नेपाली काँग्रेसका नेता आनन्दप्रसाद ढुंगाना र बैंकका अध्यक्ष सुरेन्द्र भण्डारीले संयुक्तरुपमा यस कार्यालयको उद्घाटन गरेका हुन् ।
यसअघि सञ्चालनमा आएको राष्ट्रिय सहकारी बैंकले सबै सहकारी क्षेत्रलाई समेट्न नसकेको र कम्युनिष्टहरूको मात्रै सहकारी बैंक जस्तो भएर पक्षपातरुपमा रुपमा व्यवहार गरेकाले सबैको साझा सहकारी बैंकको रुपमा नेपाल सहकारी बैंक सञ्चालन गर्न लागिएको अध्यक्ष भण्डारीले बताए ।
नेपाल राष्ट्र बैंकको सञ्चालक समितिबाट सीमित बैंकिङ कारोबार गर्न पाउने गरी लाइसेन्स पाउनासाथै नेपाल सहकारी बैंक सञ्चालनमा आउने बताउँदै उनले छ महिनाभित्र बैंकको कर्पोरेट अफिस सञ्चालनमा ल्याई कारोबार सुरु गर्ने बताए ।









































