गलकोट, सोमबार, २५ साउन २०७८ । गण्डकी प्रदेशका स्वास्थ्य तथा जनसङ्ख्यामन्त्री मधु अधिकारीले आज धौलागिरि अस्पताल बागलुङको अवलोकन तथा निरीक्षण गर्नुभएको छ ।
सो अवसरमा उहाँले आइसोलेशन कक्ष, अक्सिजन प्लान्ट, शिशु सघन कक्ष, प्रसूति कक्ष, पीसीआर प्रयोगशाला र डायलासिस कक्षको वस्तुस्थित तथा अस्पतालको सूचना केन्द्रबाट फोन गरेर कोरोना सङ्क्रमितको स्वास्थ्य अवस्थाका बारेमा जानकारी लिनुभयो ।
सोही अवसरमा अस्पतालद्वारा आयोजित अन्तरक्रिया कार्यक्रममा मन्त्री अधिकारीले अस्पतालको स्तरोन्नतिका लागि प्रदेश सरकार प्रतिबद्ध रहेको बताउँदै कोरोना भाइरस सङ्क्रमण रोकथाम तथा नियन्त्रणमा अस्पतालले महत्वपूर्ण काम गरेको उल्लेख गर्नुभयो । “अस्पतालमा दक्ष जनशक्ति र उपकरण थप्दै जानुपर्ने अवस्था छ, अस्पताललाई दुई सय शय्यामा स्तरोन्नति गर्दा भवनसमेत थप्नुपर्ने हुन्छ”, उहाँले भन्नुभयो, “अस्पतालको विकासप्रति सरकार संवेदनशील छ, छिट्टै नै आवश्यक जनशक्ति र उपकरणको व्यवस्थापन गरिनेछ ।”
अस्पतालका मेडिकल सुपरिटेन्डेन्ट डा शैलेन्द्र विक पोखरेलले अस्पतालको अवस्था, कार्यप्रगति, समस्या र चुनौतीका विषयमा जानकारी गराउनुभयो ।
अस्पताल व्यवस्थापन समितिका अध्यक्ष केबी राना मगरले कोरोना महामारीसँग जुध्न स्थापना भएको आईसीयू र भेन्टिलेटरमा जनशक्ति अभाव टड्कारो समस्याका रुपमा रहेको बताउँदै अस्पतालमा निर्माणाधीन ‘सी’ ब्लकको भवन निर्माण सुरु भएको आठ वर्षमा पनि सम्पन्न नभएकोमा मन्त्री अधिकारीलाई ध्यानाकर्षण गराउनुभयो ।








































