काठमाडौं, शुक्रबार, ६ चैत्र २०७७ । फ्रेन्चाइज फुटबल प्रतियोगिता ‘नेपाल सुपर लिग’ को खेलाडी किनबेच अक्सनमा ८ खेलाडी २ लाख भन्दा बढी मूल्यमा अनुबन्धित भएका छन् ।
नेपाल स्पोर्टस म्यानेजमेन्टको आयोजनामा शुक्रबार बिहान ११ बजेदेखि सुरु भएको किनबेचमा ८ खेलाडी सर्वाधिक महँगो मूल्यमा अनुबन्धित भएका हुन् ।
सर्वाधिक महँगो मूल्यमा अनुबन्धित हुने खेलाडीमा सुजल श्रेष्ठ, दीप कार्की,दिनेश राजवंशी, विकास खवास, एरिक विष्ट, तेज तामाङ, सुनिल बल र विशाल सुनुवार रहेका छन् ।
सुजल श्रेष्ठ पोखरा थण्डर्समा अनुबन्ध भएका छन् । उनलाई थण्डर्सले चिट्ठामार्फत् पाएको हो । पोखराले गोलकिपर दीप कार्कीलाई पनि २ लाख रुपैयाँमा अनुबन्ध गरेको छ ।
ललितपुर सिटी फुटबल क्लबले मिडफिल्डर एरिक विष्टलाई २ लाखमा अनुबन्ध गरेको छ । काठमाडौं रेजर्सले मिडफिल्डर तेज तामाङलाई, चितवनले गोलकिपर विशाल सुनार, डिफेण्डर विकास खवासलाई, विराटनगरले मिडफिल्डर सुनिल बललाई समान २ लाख रुपैयाँमा अनुबन्ध गरेको छ । यस्तै धनगढी एफसीले दिनेश राजवंशीलाई २ लाखमा अनुबन्ध गरेको छ ।
लिगमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् । त्रिपुरेश्वरस्थित दशरथ रंगशालामा आयोजना हुने लिग बैशाख ११ गतेदेखि २५ गतेसम्म सञ्चालन हुनेछ ।









































