काठमाडौँ, बुधबार, २६ फागुन २०७७ । जर्मन क्लब बोरुसिया डर्टमण्ड च्याम्पियन्स लिगको क्वाटरफाइनलमा प्रवेश गरेको छ ।
गएराति भएको प्रि–क्वाटरफाइनलको दोस्रो लेगको खेलमा सेभियासँग २-२को बराबरीमा रोकिँदा समग्रमा ५४को जित निकाल्दै डर्टमण्डले अन्तिम ८ मा स्थान पक्का गरेको हो ।
खेलको ३५ औं मिनेटमा एर्लिङ ब्राउट हालान्डले गोल गर्दै डर्टमण्डलाई अग्रता दिलाएका थिए । ५४ औं मिनेटमा हालाण्डले पेनाल्टीमा व्यक्तिगत दोस्रो गोल गर्दै डर्टमण्डको अग्रता दोब्बर पारे । योसँगै हालान्डले च्याम्पियन्स लिगमा नयाँ कीर्तिमान बनाएका छन् ।
२० वर्षीय हालान्डले च्याम्पियन्स लिगको १४ खेलमा २० गोल गर्दै नयाँ कीर्तिमान बनाएका हुन् । यसअघि यो कीर्तिमान इंग्लिस क्लब टोटनहमका ह्यारी केनले २४ खेलमा २० गोल गर्दै राखेका थिए ।
खेलको ६९औं मिनेटमा युसुफ एन नासरीले पेनाल्टीमा गोल गर्दै सेभियालाई खेलमा फर्काउने कोसिस गरे । खेलको इन्जुरी समयमा युसुफले व्यक्तिगत दोस्रो गोल गर्दै सेभियालाई २-२को बराबरीमा फर्काएपनि प्रतियोगिताको अन्तिम १६ बाटै बाहिरिन पुग्यो । पहिलो लेगमा डर्टमण्डले सेभियालाई ३-२ गोल अन्तरले पराजित गरेको थियो ।









































