काठमाडौँ, सोमबार, १७ फागुन २०७७ । नेकपा प्रचण्ड–नेपाल पक्षका नेता योगेश भट्टराई सवार गाडीले साइकल यात्रुलाई ठक्कर दिएको छ ।
रौतहटको चन्द्रपुर नगरपालिका-४ स्थित पूर्वपश्चिम राजमार्गमा आइतबार राति नेता भट्टराई सवार ज १ झ ४२७ नम्बरको स्करपियोले साइकल यात्री चन्द्रपुर ६ का ५५ वर्षीय ईन्द्रप्रसाद घिमिरेलाई ठक्कर दिएको हो । ठक्करबाट घाइते भएका घिमिरेलाई थप उपचारका लागि काठमाडौं रिफर गरेको प्रहरीले जनाएको छ । घाइते घिमिरको टाउको र शरीरका विभिन्न भागमा चोट लागेको छ ।
जनकपुरबाट पार्टीको कार्यक्रम सकेर नेता भट्टराई हेटौंडा आउँदै गर्दा उक्त दुर्घटना भएको हो । घाइतेको सम्पूर्ण उपचार खर्च नेता भट्टराईले नै बेहोर्ने प्रहरीले जनाएको छ । दुर्घटनापछि प्रहरीले धनुषा बटेश्वर–७ घर भएका स्करपियो चालक धर्मदास महत्तोलाई नियन्त्रणमा लिएको छ ।








































