काठमाडौँ, सोमबार, २६ माघ २०७७ । इंग्लिस प्रिमियर लिग फुटबलको लिग लिडर म्यानचेस्टर सिटीले लिभरपुलमाथि ४-१ गोल अन्तरको शानदार जित निकालेको छ । यो जित सिटीको लागि लिभरपुलको घरेलु मैदान सन् २००३ पछिको पहिलो हो ।
आइतबार राति भएको खेलमा लिभरपुलको घरेलु मैदान एनफिल्डमा सिटीलाई जित दिलाउन इल्के गुण्डोगानले दुई गोल भने रहिम स्ट्रर्लिङ र फिल फोडेनले एक-एक गोल गरे ।
घरेलु टोली लिभरपुलका लागि एक मात्र सान्त्वना गोल मोहमद सलाहले फर्काए ।
सिटीले खेलको ३७ औं मिनेटमा सिटीले पेनाल्टीको अवसर प्राप्त गर्यो । गुण्डोगानले उक्त सुनौलो अवसर गोलमा परिणत गर्न सकेनन् । गुण्डोगानको पेनाल्टी प्रहार बाहिरिंदा सिटीले पहिलो हाफमा गोलरहित बराबरी खेल्न बाध्य भयो।
खेलको दोस्रो हाफमा भने उनै गुण्डोगान नायक बन्दै खेलको ४९ औं मिनेटमा गुण्डोगानले गोल गर्दै सिटीलाई १-० को अग्रता दिलाए । तर, ६३ औं मिनेटमा लिभरपुलले बराबरी गोल फर्कायो । रुबेन डियासले पेनाल्टी बक्सभित्र लडाएपछि पाएको पेनाल्टीमा सलाहले सहजै गोल गरे ।
खेलको ७३ औं मिनेटमा गुण्डोगानले व्यक्तिगत दोस्रो गोल गर्दै सिटीलाई २-१ को अग्रता दिलाए । त्यस्तै, खेलको ७६ औं मिनेटमा स्ट्रर्लिङले गोल गर्दा सिटीले ३-१ को अग्रता बनायो । त्यसपछि खेलको ८३ औं मिनेटमा फोडेनले गोल गर्दै सिटीलाई ४-१ को सहज जित दिलाए ।
जितसंगै सिटीले २२ खेलमा ५० अंक जोडेको छ । यस्तै सिटीले दोस्रो स्थानको म्यानचेस्टर युनाईटेडविरुद्ध ५ अंकको अग्रता समेत बनाएको छ । लिभरपुल भने २३ खेलमा ४० अंक जोडेको छ । सिटीसँगको हार घरेलु मैदानमा लिभरपुलको लगातार तेस्रो हार हो ।









































