काठमाडौँ, शुक्रबार, २३ असोज २०७७ । करिब २६ दिनदेखि सत्याग्रहमा रहेका डा. गोविन्द के सी लाई निमोनियाँको लक्षण देखिएपछि छातीको सिटीस्क्यान गरिएको छ ।
उपचारमा संलग्न चिकित्सकहरुलाई उद्धृत गदै सहयोगी तोसिमा कार्कीले छातीको जाँच गर्दा समस्या देखिएपछि सिटीस्क्यान गरिएको जानकारी दिइन् । उनका अनुसार शरीरमा अक्सिजन, रक्तचाप, चिनी, श्वासप्रश्वासको मात्रा निकै कम देखिएको छ । उनले भनिन्, “उहाँलाई निमोनियाँका लक्षणहरु देखिएपछि छातीको सिटीस्क्यान गरिएको छ ।”
डा. के सी भदौ २९ गते जुम्लामा ६ बुँदे माग राखेर सत्याग्रह सुरु गरेका थिए ।
सरकार र डा. केसीका प्रतिनिधिबीच शुक्रबार बस्ने गरी टुंगिएको वार्ता अझै सुरु भएको छैन । डा. केसी समर्थकले ४ बजेसम्म पनि वार्ता नगरे उनको जीवनरक्षाका लागि आन्दोलनका कार्यक्रम अगाडि बढाउने चेतावनीसमेत दिएका छन् ।








































