काठमाडौं १४ बैशाख २०७७ । आफ्ना सांसदको अपहरण गरिएको भन्दै मुद्दा दर्ता गर्न जनता समाजवादी पार्टीका नेताहरु प्रहरी कार्यालयमा पुगेका छन् ।
सत्तारुढ नेपाल कम्युनिस्ट पार्टी (नेकपा)का सांसदद्वय महेश बस्नेत र किसान श्रेष्ठ तथा पूर्वप्रहरी महानिरीक्षक सवेन्द्र खनालविरुद्ध अपहरण तथा शरीर बन्धकको मुद्दा दर्ता गर्न जनता समाजवादी पार्टीका नेताहरु महानगरीय प्रहरी परिसर, काठमाडौं पुगेका हुन् ।
उक्त पार्टीका सांसद एवं पूर्व स्वास्थ्यमन्त्री सुरेन्द्र यादवसँगै जसपाका शीर्ष नेताहरु पूर्वप्रधानमन्त्री डा. बाबुराम भट्टराई, उपेन्द्र यादव, राजेन्द्र महतोलगायत टेकु पुगेका हुन् ।
काठमाडौं प्रहरीले घटनास्थल महोत्तरी भएकाले उता उजुरी गर्न भनेको छ ।
खनाल, बस्नेत र श्रेष्ठले गत बुधबार सांसद यादवलाई अपहरणको शैलीमा जनकपुरबाट काठमाडौं ल्याएको आरोप छ ।
सत्तारुढ नेकपाले तत्कालीन समाजवादी पार्टी फुटाएर यादवको गुटलाई सरकारमा सहभागी गराउने अध्यादेशमार्फत राजनीतिक दलसम्बन्धी अध्यादेश जारी गरेको भन्दै आलोचना भइरहेको छ ।
बुधबार राति नै समाजवादी पार्टी र राजपा नेपाल एक भई जनता समाजवादी पार्टी, नेपाल गठन गरिएको छ । सांसदद्वय र खनालविरुद्ध अपहरण तथा शरीर बन्धकसम्बन्धी मुद्दा दर्ता गर्ने तयारी छ ।








































