बागलुङ, १७ मङ्सिर २०७६ । बागलुङको बडिगार्ड गाउँपालिकामा जीप खोलामा खस्दा १४ जनाको घटनास्थलमै मृत्यु भएको छ। जीपमा रहेका मध्ये नौ महिला, चार पुरुष र एक बालकको घटनास्थलमै मृत्यु भएको हो।

मंगलबार बिहान गुल्मीको इश्मा गाउँपालिका–५ दोहोली रिप कैयापाटाबाट बागलुङको निसीखोला गाउँपालिकातर्फ जाँदै गरेको ज १ ज ५२१९ नम्बरको जिप बडिगाड गाउँपालिकामा दुर्घटना भएको थियो। जीप मध्य पहाडी लोकमार्गबाट पाँच सय मिटर तल खोलामा खसेको थियो।

दुर्घटनामा मृत्यु भएका १४ मध्ये १० जनाको पहिचान खुलेको छ।

दुर्घटनामा ज्यान गुमाउनेमा गुल्मी इश्मा गाउँपालिका-५का रेशम थापा, माया थापा, दोबाटा बसुन्धरा कार्की, सिता कार्की, भवि कार्की, भुमि कार्की, मिना बस्नेत, धनबहादुर कार्की, नवलपरासी बर्दघाथ नगरपालिका-१ बस्ने भुमा कार्की, बागलुङ बडिगाड गाउँपालिका–७ नरमाया खत्री रहेका छन्।

मृत्यु हुने अन्य चार जनाको भने सनाखत हुन सकेको छैन। मृत्यु भएकाहरुको बुर्तिबाङ अस्पतालमै पोस्टमार्टम गरि शव आफन्तलाई बुझाइने प्रहरीले जनाएको छ। दुर्घटनामा परी गम्भीर घाइते हुनेहरुमा नवलपरासी बर्दघाट नगरपालिका–२का जीवन कार्की, गुल्मी इश्मा गाउँपालिका–४ का हिमाल कार्की र निमा केसी रहेका छन्।

उनीहरुको ढोरपाटनस्थित बुर्तिबाङ अस्पतालमा उपचार भइरहेको र हेलिकप्टरमार्फत् थप उपचारका लागि काठमाडौं लैजाने तयारीमा रहेको प्रमुख जिल्ला अधिकारी लुकबहादुर क्षत्रीले बताए।

दुर्घटनामा गुल्मी इश्मा गाउँपालिका–४ का १५ वर्षे धनबहादुर कार्की बेपत्ता भएका छन्। उनको खोजीकार्य जारी रहेको जिल्ला प्रहरी प्रमुख भट्टले जानकारी दिए।

जानकारीको लागी तल फोटोमा किल्क गर्नु होला ,सुमेघ ट्राभल्स्