गोरखा, १६ असोज २०७६ । पालुङ्टार नगरपालिका, लिगलिगकोट विकास अभियान र रणसिंह दल गणको संयुक्त आयोजनामा १०औ लिगलिगे दौड प्रतियोगिता सम्पन्न भएको छ ।
पर्वतका अनिश थापा मगर १०औ लिगलिगे दौड जितेर छैटौं पटक पनि लिगलिगे राजा बन्न सफल हुनु भएको छ ।
चेपे र मस्र्याङ्दीको दोभानबाट लिगलिगकोटसम्मको १३.८ किलोमिटर दुरी ५७.५५ मिनेटमा पार गर्दै थापा लिगलिगे दौड जितेर लिगलिगे राजा बन्न सफल हुनु भएको हो ।
यसअघि पाँच पटकसम्म लिगलिगे राजा बन्न सफल हुनु भएको हो । थापा भारतीय सेनामा कार्यरत हुनुहुन्छ ।
त्यसैगरी १ घण्टा एक मिनेट ८ सेकेण्डमा पार गरी डोटी जिल्लाका खगेन्द्रबहादुर भाट दोस्रो बन्न सफल हुनु भएको छ ।
१ घण्टा १ मिनेट ३४ सेकेण्डमा पार गरी लम्जुङका रामजी बस्नेत तेस्रो हुन सफल हुनु भएको छ । दोस्रो र तेस्रो हुने दुवै जना नेपाली सेनामा हुनुहुन्छ ।
निर्धारित दुरी एकघण्टा दुई मिनेट २२ सेकेण्डमा पार गरी सन्दीप ढकाल चौथो बन्न सफल हुनु भएको छ ।
लिगलिगे दौडमा प्रथम हुनेलाई यसबर्षदेखि एक दिनका लागि लिगलिगे राजाका साथै एकबर्षका लागि पालुङ्टार नगरपालिकाको सद्भावना दूत पनि घोषणा गरिने भएको छ ।
आज एक समारोहको आयोजना गरी १० औ लिगलिगे राजा र पहिलो सद्भावना दूत घोषणा गर्ने कार्यक्रम रहेको पालुङ्टार नगरपालिकाका मेयर दीपकबाबु कँडेलले जानकारी दिनुभयो ।
‘दौडमा प्रथम हुनेलाई यसअघि एक दिनका लागि लिगलिगे राजा घोषणा गरिन्थ्यो’, ‘यस बर्षदेखि नयाँ कार्यक्रम ल्याएका छौं । अबदेखि जो विजयी हुन्छ, उहाँलाई एकबर्षका लागि पालुङ्टार नगरपालिकाको सद्भावना दूत बनाइनेछ । उहाँले भन्नुभयो । नगरपालिकाले आयोजना गरेका ठूला कार्यक्रमहरुमा उहाँलाई स–सम्मान दूतको रुपमा आमन्त्रण गराइनेछ ।’ सद्भावना दूतले पनि यस क्षेत्रको पर्यटन प्रवद्र्धनका लागि उल्लेखनीय काम गर्ने बताउनु भयो ।
प्रतियोगितामा प्रथम हुनेलाई एक समारोहकाबीच राष्ट्रिय सभाका नेता सुरेन्द्र पाण्डेले ६० हजार १ सय रुपैयाँ, लिगलिगे राजाको र पालुङ्टार नगरपालिकाको सद्भावना दूतको दर्जा, श्रीपेच, पगरीमा सजाउने, मेडल र प्रमाणपत्र पुरस्कार दिइने कार्यक्रम रहेको मेयर कँडेलले जानकारी दिनुभयो । साथै, राजकीय सम्मानका साथ पालुङटार नगर परिक्रमा गराइने कार्यक्रम रहेको बताउनु भयो ।
त्यसैगरी, दोस्रो हुनेलाई ३५ हजार १ सय रुपैयाँ, तेस्रो हुनेलाई २५ हजार १ सय रुपैयाँ, चौथो हुनेलाई १५ हजार र पाँचौ हुनेलाई १० हजार रुपैयाँ सहित मेडल र प्रमाणपत्र पुरस्कार रहेको आयोजकले जनाएको छ ।
प्रतियोगितामा छैटौं हुनेलाई सात हजार, सातौं हुनेलाई पाँच हजार, आठौं हुनेलाई चार हजार, नवौं हुनेलाई तीन हजार र दशौं हुनेलाई नगद दुई हजार रुपैयाँ सहित मेडल र प्रमाणपत्र पुरस्कार प्रदान गरिने आयोजकले जनाएको छ ।









































