काठमाडौं, १० असार २०७६ । विदेशी च्यानल प्रशारण बन्द गरेको भन्दै केवल टेलिभिजन प्रदायकविरुद्ध केन्द्रीय अनुसन्धान ब्युरो (सीआईबी) मा उजुरी परेको छ । उपभोक्ता हित संरक्षण मञ्चले सुविसु केवल नेटका सञ्चालक सुधिर पराजुली र वागेश्वरी केवल टेलिभिजनका सञ्चालक लक्ष्मीनारायण शाहविरुद्ध उजुरी दर्ता गरेको हो ।
उजुरीमा करोडौं रुपैयाँ अग्रिम भुक्तानी असुल गरेका उभोक्तालाई अन्याय गरेको आरोप लगाइएको छ । केवल टेलिभिजन व्यवसायीले नेपालमा प्रशारण हुने विदेशी च्यानल क्लिन फिड हुनुपर्ने व्यवस्था सरकारले गर्न लागेकोमा सोमबार ३ बजेदेखि २४ घन्टा क्लिन फिड प्रशारण गरेका छन् । जसमार्फत् टेलिभिजन प्रशारणमा अवरोध पुगेको आरोप लगाइएको छ ।
मञ्चले ती केबल टेलिभिजन सञ्चालकको उपभोक्तासँगको सझौता, कारोबार, प्रशारण सम्बन्धी सम्पूर्ण विवरण, कागजात तथा कप्युटर फाइल समेतको रेकर्ड झिकी बुझी अनुसन्धान गर्न माग गरिएको छ ।
मञ्चका उपमहासचिव विष्णुप्रसाद तिमिल्सिनाले दर्ता गरेको उजुरीमा सार्वजनिक सेवा टेलिभिजन अवरुद्ध पार्ने अपराधजन्य कार्यमा संलग्न व्यक्तिलाई सजाय गर्न र अवरुद्ध सेवा सञ्चालन गरी उपभोक्ताको हित संरक्षण तथा पीडित उपभोक्तालाई क्षतिपूर्ति भराउन माग गरिएको छ ।
उजुरी दर्ता गर्ने तिमल्सिनाले बाह्रखरीसँग भने, “अग्रिम भुक्तानी लिएर सार्वजनिक सेवा अवरुद्ध गर्न पाइन्छ ? भनेर उजुरी दर्ता गरेका छौं ।” उनीहरुले अवैधानिक संस्थाको नाममा सार्वजनिक सेवामा अवरुद्ध गर्ने प्रयास गरेका छन् । यो कार्य मुलुकी फौजदारी संहिताको अपराध बमोजिम रहेको हाम्रो ठहर छ ।”
