काठमाडौं, ४ असार २०७६ । लोक सेवा आयोगले विभिन्न पदका लागि खोलेको विज्ञापनमा आवेदन दिने म्याद थपेको छ । बीचमा विज्ञापन रद्द गर्ने वा नगर्ने भन्ने विवादका कारण फाराम भर्न रोकिएको र पछिल्लो समय अत्याधिक चाप भएका कारण म्याद थपिएको हो ।
फाराम भर्ने अन्तिम म्याद आइपुग्दा फाराम भर्नेको अत्याधिक चापका कारण लोकसेवाको सर्भर नै डाउन भएपछि आवेदन दिन पाएका थिएनन् ।
मंगलबार एक सूचना जारी गर्दै लोक सेवा आयोगले असार १० गतेसम्म फारम भर्ने म्याद थप गरिएको जानकारी दिएको छ ।
जेठ १५ गते ५१५ स्थानीय तहका लागि लोक सेवाले विभिन्न तहमा गरी ९ हजारभन्दा बढी पदका लागि आवेदन माग गरेको थियो । आयोगको सर्भरमा चाप भइ दरखास्त अपलोड गर्न कठिनाइ भएकोले फाराम भर्ने म्याद असार १० गतेसम्म कायम गरिएको सूचनामा उल्लेख छ ।
दोब्बर दस्तुर तिरी आवेदन गर्ने म्याद असार १७ गतेसम्म कायम गरिएको छ ।
