काठमाडौं, २३ बैशाख २०७६ । आज प्रधानमन्त्री केपी शर्मा ओलीले नीति तथा कार्यक्रममाथि साँसदहरुले उठाएका प्रश्नहरुको जवाफ दिदैंछन् । आगामी आर्थिक वर्ष ०७६/७७ का लागि राष्ट्रपति विद्यादेवी भण्डारीद्धारा प्रस्तुत नीति तथा कार्यक्रममाथि सत्तापक्ष र प्रतिपक्ष दुबै साँसदहरुले प्रश्न उठाएपछि यसबारे प्रधानमन्त्री ओलीले आज संसदमा जवाव दिन लागेका हुन् ।
नीति तथा कार्यक्रममाथि संसदमा भएको छलफलका क्रममा उब्जिएका प्रश्नहरुको जवाफ प्रधानमन्त्रीले दिने प्रचलन पनि छ । सोहीअनुसार प्रधानमन्त्रीले साँसदहरुले गरेको प्रश्नको जवाफ दिदैंछन् । सत्तापक्षका नेताहरुले राष्ट्रपतिको सरकार नभई जनताको सरकार भएको टिप्पणी गर्दै आएका छन् ।
यता, प्रतिपक्षी दल नेपाली काङ्ग्रेसले पनि नीति तथा कार्यक्रमको चर्कौ आलोचना गर्दै आएको छ । काङ्ग्रेसले राष्ट्रपतिले प्रयोग गरेको ‘मेरो सरकार’ पदावली र संविधान सर्वस्वीकार्य भएको शब्दावलीप्रति आपत्ति जनाउँदै दुई तिहाईको बलियो सरकारले ल्याएको नीति तथा कार्यक्रम गतबर्षहरुकै निरन्तरता भएको तर्क गरेको छ । कांग्रेसलगायतका दलहरुले नीति तथा कार्यक्रममा ६ वटा संशोधन दर्ता गराएका छन् । आज यिनै विषयमा रहेर प्रधानमन्त्री ओलीले संसदमा जवाव दिने संसद सचिवालयले जनाएको छ । नीति तथा कार्यक्रममाथिको छलफल आज सकिँदै छ ।
