पोखरा, २० बैशाख २०७६ । गण्डकी प्रदेश प्रमुख बाबुराम कुँवरले सूर्तिजन्य पदार्थ (नियन्त्रण र नियमन) गर्ने सम्बन्धमा व्यवस्था गर्न बनेको विधेयकलाई प्रमाणिकरण गरेका छन् ।
गण्डकी प्रदेशसभाले पारित गरेको उक्त विधेयक प्रमुख कुँवरले बिहीबार प्रमाणिकरण गरेका हुन् । गण्डकी प्रदेशसभाको यही वैशाख ८ गते बसेको बैठकले पारित गरेको विधेयकलाई गण्डकी प्रदेश सभामुख नेत्रनाथ अधिकारीले सोही दिन प्रमाणित गरेपछि गण्डकी प्रदेशसभा सचिवालयले प्रमाणिकरणका लागि प्रदेश प्रमुखको कार्यालयमा पठाएको थियो ।
नेपालको संविधान धारा १९९ को उपधारा १ मा प्रदेशसभाले पारित गरेका विधेयक प्रमाणिकरणका लागि प्रदेश प्रमुख समक्ष पेश गर्नुपर्ने प्रावधान छ । प्रदेश प्रमुख कुँवरले बिहीबार नै पाँच÷पाँच प्रति विधेयकमा हस्ताक्षर गरी प्रमाणिकरण गरेका थिए । नेपालको संविधानको धारा २०१ को उपधारा २ बमोजिम प्रदेश प्रमुखले विधेयक प्रमाणिकरण गरेका हुन् । सोही धाराको उपधारा ५ बमोजिम प्रदेश प्रमुखबाट प्रमाणिकरण भएपछि विधेयक ऐन बन्छ ।
गण्डकी प्रदेश प्रमुख कार्यालयका निमित्त सचिव विश्वप्रकाश न्यौपानेले प्रदेश प्रमुख कुँवरले प्रमाणित गरेका ती विधेयकमध्ये एकप्रति प्रदेश प्रमुखको कार्यालयमा राखिएको र आन्तरिक मामिला तथा कानून मन्त्रालय, मुख्यमन्त्री तथा मन्त्रिपरिषद्को कार्यालय, प्रदेशसभाको सचिवालय र सङ्घीय कानून तथा संसदीय व्यवस्था मन्त्रालयमा एक÷एक प्रति पठाइएको जानकारी दिए ।
