एजेन्सी, २५ चैत्र २०७५ । लिबियाको राजधानी त्रिपोलीनजिक खलिफा हफ्तारप्रति वफादार सैनिकसँगको भिडन्तमा कम्तीमा ३२ जनाको मृत्यु हुनुका साथै ५० जना घाइते भएका छन् ।
राष्ट्रसंघसमर्थित लिबियाली सरकारका स्वास्थ्यमन्त्री अहमिद ओमारको भिडन्तमा हफ्तारसमर्थित १४ जना लडाकुसमेत मारिएको जानकारी दिए । आइतबार पनि त्रिपोलीनजिक हफ्तारसमर्थित लडाकुहरू र अन्तर्राष्ट्रिय रूपमा मान्यताप्राप्त सरकारबीच भिडन्त भएको थियो । राजधानी कब्जा गर्ने उद्देश्यसहित दुबै पक्षबाट हवाई आक्रमणसमेत भएका थिए ।
संयुक्तराष्ट्र संघ र संयुक्त राज्य अमेरिकाले तत्कालै युद्धविराम गर्न दुवै पक्षलाई आग्रह गरे पनि भिडन्तहरू रोकिएका छैनन् । लिबियाका नेता मौमर गद्दाफीको सन् २०११ मा मृत्यु भएपछि पनि लिबियामा विभिन्न समूहबीच युद्ध जारी छ । यी समूहबीच शक्ति हत्याउने र तेलकुवामा बर्चश्व कायम गर्न बेलाबखत भिडन्त हुने गरेको छ ।
हफ्तारको पछिल्लो क्रियाकलापले मुलुकलाई गृहयुद्धमा धकेल्ने सम्भावना रहेको जानकारहरू बताउँछन् । लिबियामा जारी द्वन्द्वको शान्तिपूर्ण समाधानका निम्ति भइरहेका अन्तर्राष्ट्रिय कूटनीतिक प्रयास पनि सफल हुन सकेका छैनन् ।
