गोरखा, ७ चैत्र २०७५ । गोरखाको पालुङ्टारमा सम्पन्न गण्डकी प्रदेश स्तरीय लिगलिग पालुङटार मेयर कप फुटबल प्रतियोगिताको उपाधि गोरखा नगरपालिकाले जितेको छ । पालुङटार हवाईमैदानमा बुधबार सम्पन्न भएको फाइनल खेलमा गैडाकोट नगरपालिका नवलपुरलाई २–० ले पराजित गर्दै गोरखा विजेता बनेको हो ।
खेलको दोस्रो हाफमा जर्सी नं ५ का विकास गुरुङ र जर्सीनं ६ का जमिर मास्केले गरेको एक÷एक गोलले गोरखालाई उपाधि दिलायो । गोरखाको तर्फबाट २ गोल हुँदा गैडाकोटले एक गोल पनि फर्काउन सकेन । प्रतियोगिताको बिजेता बनेको गोरखाले नगद पुरस्कार दुई लाख ३४ हजार ५ सय ६७ रुपैयाँ र उपविजेता गैडाकोटले नगद एकलाख २३ हजार ४५६ रुपैयाँका साथमा ट्रफी, मेडल र प्रमाण पत्र पुरस्कार पाएका छन् । प्रतियोगिताको सेमिफाईनलमा पुगेका देवचुली नगरपालिका नवलपुर र पुतलीबजार नगरपालिका स्याङजाले नगद ५४ हजार ३२१ रुपैयाँ पुरस्कार पाएका छन् ।
प्रतियोगिताको सर्वोत्कृष्ट खेलाडी गोरखा नगरपालिकाका विवेक गुरुङ भएका छन् । उनले नगद १२ हजार दुईसय ४५ रुपैयाँ सहित गोल्डेन बुट पाएकाछन् । यस्तै गोरखाकै जमिर मास्के सर्वाधिक गोलकर्ता भएका छन् । प्रतियोगिता अबधिभर ५ गोल गरेका उनले नगद नौ हजार ८ सय ७६ रुपैयाँ पाएका छन् । प्रतियोगिता अबधिभर विपक्षीलाई एउटा पनि गोल हुन नदिएका गोरखाका गोलकिपर सिलन थापा मगर उत्कृष्ट गोलरक्षक बनेका छन् ।
उनले पनि नगद नौ हजार आठसय ७६ रुपैयाँ पाएका छन् । यस्तै, उत्कृष्ट अग्रपंक्तिमा पुरस्कृत भएका गोरखाकै विकास गुरुङले पनि नगद नौ हजार आठसय ७६ रुपैयाँ पाएका छन् । प्रतियोगिताको उत्कृष्ट रक्षापंक्ति गैडाकोटका प्रविण गुरुङ र उत्कृष्ट मध्यपक्ति पनि सोही टिमका रोशन दर्लामी मगर बने । उनीहरुले पनि नगद नौ हजार ८ सय ७६ रुपैयाँ पुरस्कार पाएका छन् ।
प्रतियोगिताका विजेताहरुलाई एक समारोहका बिच राष्ट्रिय सभाका विपक्षी दलका नेता सुरेन्द्र पाण्डे, गण्डकी प्रदेशका सांसद प्रकाशचन्द्र दवाडी र हरिशरण आचार्य, पालुङटार नगरपालिकाका मेयर दिपकबाबु कँडेल, उपमेयर पम्फा बसेल, प्रतियोगिताका संयोजक बसन्त श्रेष्ठ लगायतले पुरस्कार प्रदान गरेका थिए । पालुङटार नगरपालिकाको आयोजनामा भएको प्रतियोगितामा गण्डकी प्रदेशका १८ स्थानीय तहका खेलाडी सहभागी थिए । दरौदी
