गोरखा, भाद्र २५ गते । पालुङटार नगरपालिका वडा नं. ५ को आयोजना तथा बौद्ध हिमाल युवा क्लबको व्यवस्थापनमा सम्पन्न प्रथम वडा कप फुटबल प्रतियोगिताको ट्रफी बौद्ध हिमाल युवा क्लबको टिम ए ले उचालेको छ ।
यही भाद्र २१ गते देखि २४ गते सम्म आयोजित प्रतियोगिताको फाईनलमा शिवशक्ति युवा क्लबलाई ३–० को अग्रताले पछि पार्दै बौद्ध हिमाल युवा क्लब विजयी भएको हो ।
ब्लू स्टार युवा क्लब टिम ए लाई पछि १–० ले पछि पार्दै फाईनल प्रवेश गरेको बौद्ध हिमाल र ब्लू स्टार युवा क्लब टिम बी लाई २–० ले पछि पार्दै प्रवेश गरेको फाईनल खेलमा बौद्ध हिमालको लागि विशाल रानाले १, विकल रानाले १ र साजन श्रेष्ठले १ गोलको योगदान गर्न सफल भएका थिए, त्यस्तै फाईनल खेलको म्यान अफ दि म्याच विशाल राना भएका थिए ।
नौ वटा टिम सहभागी प्रतियोगितामा वडा नं. ५ भित्र रहेका ६ ओटा युवा क्लबका बढीमा दुई ओटा टिम सहभागी भएका थिए । वडा कप २०७५ को उत्कृष्ट गोल रक्षक बौद्ध हिमालका अमिन राजभाट, उत्कृष्ट डिफेन्स बौद्ध हिमालकै अमृत कुँवर, सर्वाधिक गोलकर्ता शिवशक्तिका आशिष खरेल र उत्कृष्ट खेलाडी बौद्ध हिमालका सरोज गिरी भएका थिए ।
वडा नं. ५ को उत्कृष्ट फुटबल टिम निर्माण गर्ने उद्देश्यले आयोजित प्रतियोगिताको प्रथम पुरस्कार नगद रु. २०,०००÷– ट्रफी र मेडल तथा द्धितिय पुरस्कार नगद रु. १३,०००÷– ट्रफी र मेडल राखिएको थियो ।
यस वर्ष बौद्ध हिमाल युवा क्लबले व्यवस्थापन गरेको वडा कप फुटबल २०७६ सालमा ब्लू स्टार युवा क्लबले गर्ने कार्यक्रम रहेको छ । हरेको वर्ष नियमित आयोजना हुने वडा कपले फुटबलले सबैलाई जोड्ने र राम्रा खेलाडी उत्पादन गर्न सहयोग पुग्ने आशा गरिएको वडा नं. ५ का वडा अध्यक्ष दिपक पाण्डेले जानकारी दिनुभयो ।
