काठमाडौं, श्रावण २५, २०७५ । ब्रिटिस फाइनान्स कम्पनीमा सेक्यूरिटी गार्डमा कार्यरत सरोज लामा दैनिक पशुपति जान्छन । बाबासँग गाँजा किनेर ल्याउँछन । अनि काठमाडौंका बिभिन्न होस्टलमा बस्ने युवा युवतीको कोठासम्म पुर्याएर बीस गुणा ज्यादा असुली गर्छन ।
उनको सेकुरिटी गार्डको जागिर दुनियालाई देखाउनका लागि मात्रै हो, मुख्य धन्दा त होस्टलमा बस्ने युवायुवतीलाई अबैध लागू औषध गाँजाको लत लगाएर दुब्र्यशनी बनाउने र आफू रातारात धनी बन्ने हो ।
महानगरीय प्रहरी वृत्त नयाँ बानेश्वरले लागू औषध सहित लामालाई पक्राउ गरेपछि खुलेको यथार्थ हो । यो यथार्थसँगै राजधानीका बिभिन्न होस्टलहरुमा रहेका युवा युवती कसरी लागू औषधको दुब्र्यशनमा फसिरहेका छन भन्ने डरलाग्दो स्वरुप बाहिर आएको छ । लामालाई लागूऔषध गाँजा बिक्री गर्दै गरेको सूचनाको आधारमा बुधवार शान्तिनगर क्षेत्रबाट प्रहरीले पक्राउ गरेको थियो ।
पक्राउपछि अनुसन्धानमा ब्रिटिस फाइनान्स कम्पनीमा सेक्यूरिटी गार्डको रुपमा कार्यरत लामाको धन्दा गाँजाको बिक्री वितरण रहेको देखियो । लामाले आफ्नो ग्राहक बानेश्वरलगायत उपत्यकाका बिभिन्न क्षेत्रका विभिन्न स्थानमा रहेका होस्टलमा बस्ने विद्यार्थी रहेको खुलासा गरे । ‘फोन गरेर कति चाहिएको हो, त्यस्को जानकारी गराउँछन, उनीहरुले मागेपछि पशुपति गएर किनेर ल्याई होस्टलसम्म पुर्याउने गरेको छु,’ प्रहरीसँगको बयानमा लामाले भनेका छन, ‘प्याक गरेर होस्टलमै लगेर जिम्मा लगाउँछु ।’
- ADVERTISEMENT -
प्रहरीका अनुसार पशुपतिबाट ५ सय रुपैयाँमा किनेर ल्याएको गाँजालाई लामाले स-सानो पोका बनाइ चार हजार रुपैयासम्ममा विक्री गर्ने गरेका छन । एक पटक ल्याउँदा ३५ सय नाफा हुने भएकै कारण गाँजा सप्लाई गरी होस्टलका बिद्यार्थीलाई लागू औषधको दुब्र्यशनमा फसाउने काममा उनी लागेको पनि बयानको क्रममा खुलाएको प्रहरीको भनाई छ । प्रहरीले उनलाई जिल्ला अदालत, काठमाडौंबाट म्याद थप गरेर विस्तृत अनुसन्धान अघि बढाएको छ ।
प्रहरीले होस्टलमा लागू औषध सेवन गर्ने गरेको सूचनाको आधारमा धेरै पटक अनुगमन गरेको छ, तर सवै प्रयोगकर्ताले अत्यन्तै गोप्य रुपमा लुकाउने गरेको कारण प्रमाण फेला पार्न सकेको थिएन । तर गाँजा सप्लाई गर्ने ब्यक्ति नै फेला परेपछि भने अनुगमनको क्रममा प्रहरीले होस्टलमै पुरिया फेला पारेको छ ।
लागू औषध यसअघि पनि बानेश्वर क्षेत्रमा प्रहरीले आयोजना गरेको ‘टोलटोलमा प्रहरी’ कार्यक्रममा होस्टलमा बस्नेहरुले गाँजाको प्रयोग गर्ने र होहल्ला गर्ने गुनासो गरेका थिए । तर, प्रमाण हात पारिसकेको थिएन ।
लामाको बयानबाट होस्टलमा बस्ने विद्यार्थीलाई गाँजा सप्लाई हुने गरेको पुष्टि भएपछि बानेश्वर वृत्तका डिएसपी गोविन्दराज काफ्लेले नेपाल होस्टल एसोसिएसनसँग समन्वय गरेर अनुगमन अघि बढाएका हुन ।
जनप्रतिनिधि, होस्टल एसोसिएसन, प्रहरी लगायतको टोलीले सुरु गरेको अनुगमनका क्रममा बिहीबार प्रहरीले विद्यार्थीको कोठाबाट तास खेल्दै गरेको अवस्थामा गाँजा बरामद गरेको थियो । ‘अनुगमनका क्रममा स्थिति निकै भयावह भेटिएको छ । होस्टलमा विद्यार्थी कसरी लागूऔषधको दुब्र्यशनमा फसिरहेका छन भन्ने डरलाग्दो तथ्य बाहिर आएको छ,’ डिएसपी काफ्लले भन्नुभयो ।
लामाको बयानपछि नेपाल होस्टल एसोसिएनका केन्द्रीय अध्यक्ष चेतन दाहाल, वडा सदस्य रोहिणी श्रेष्ठ, सामुदायिक सेवा केन्द्र र टोल सुधार समितिका पदाधिकारी, बानेश्वर वृत्तका डिएसपी काफ्ले नेतृत्वको प्रहरी टोली बिहिवार अल्फा ब्वाइज होस्टल पुग्यो । त्यहाँ अनुगमनको क्रममा तासको बुकसँगै विद्यार्थीको पलङ मुनिको ड्रयरभित्र गाँजा फेला पारेको हो ।
