एजेन्सी, असार ३०, २०७५
विश्वकप फुटबलमा आज (शनिवार) बेल्जियम र इंग्ल्याण्ड बीच प्रतिस्पर्धा हुँदैछ ।
विश्वकप फुटबल अन्तर्गत आज तेश्रो स्थानका लागि हुने खेलमा बेल्जियम विरुद्ध मैदान उत्रदा इंग्ल्याण्डको एउटै लक्ष्य हुनेछ, समूह चरणमा व्यहोरेको हारको बदला लिँदै प्रतियोगिताको सुखद अन्त्य हुनेछ । समूह जी मा रहेका दुवै टोलीले समूह चरण अन्तर्गत आफ्नो अन्तिम खेलमा प्रतिष्पर्धा गरेका थिए, जसमा बेल्जियम १–० ले विजयी भएको थियो ।
रसियाको सेन्ट पिटर्सवर्ग रङ्गशालामा हुने प्रतिस्पर्धा नेपाली समयअनुसार पौने आठ बजे सुरु हुनेछ । बेल्जियम पहिलो सेमिफाइनल खेलमा फ्रान्ससँग पराजित हुँदै प्ले अफमा पुगेको हो भने इंग्ल्याण्ड क्रोएसियासँग पराजित हुँदै प्लेअफमा पुगेको हो । आजको विजेताले विश्वकपमा तेस्रो स्थान प्राप्त गर्ने छ ।
प्रतियोगिताको उपाधिका लागि भने फ्रान्स र क्रोएसियाबीच आइतबार नेपाली समयअनुसार पौने ९ बजे मस्कोस्थित लुज्निकी रङ्गशालामा खेल हुनेछ ।
