धनगढी, बुधबार, ११ चैत्र २०७७ । कोरोना भाइरस (कोभिड १९) को संक्रमण फैलिन सक्ने सम्भावनालाई मध्यनजर गर्दै स्थानीय प्रशासनले कैलालीमा भेला हुन, जात्रा, पर्व, भीडभाड गर्न, महोत्सव, जुलुस, मेला लगाउनमा रोक लगाएको छ ।
जिल्ला प्रशासन कार्यालय कैलालीले विज्ञप्ति जारी गर्दै कैलाली जिल्लाभर होलीमा भिडभाड रोक लगाइएको हो । जिल्ला सुरक्षा समिति र जिल्ला कोभिड १९ संकट व्यवस्थापन केन्द्रको निर्णयले स्थानीय प्रशासन ऐनअनुसार प्रमुख जिल्ला अधिकारी खगेन्द्र प्रसाद रिजालले आदेश जारी गरेका छन् । यस्तै बाहिर निस्किँदा अनिवार्य मास्क प्रयोग गर्न निर्देशन दिइएको छ । भारतसँग सीमा जोडिएकाले भारतबाट आउने नागरिकको एन्टिजोन विधिमार्फत परीक्षण गर्न थालिएको छ । कोभिड १९ संक्रमणको सम्भावनालाई मध्यनजर गरी पहिले सञ्चालन आएका क्वारेन्टाइन, आइसोलेसनलाई तयारी अवस्थामा राखी स्वास्थ्य केन्द्र सेवालाई थप प्रभावकारी बनाउन आवश्यक तयारी समेत थालिएको छ । आदेशको अवज्ञा गरे कारवाही हुने कैलाली प्रशासनले जनाएको छ ।
भारतका विभिन्न शहरबाट गौरीफन्टा नाका हुँदै कैलाली प्रवेश गरेका ११ जनामा कोरोना संक्रमण पुष्टि भईसकेको छ । वछिल्लो ४÷५ दिनमा गौरीफन्टा नाका भएर कैलाली प्रवेश गरेका ११ जनामा संक्रमण पुष्टि भएको हो । कैलालीका प्रमुख जिल्ला अधिकारी खगेन्द्र प्रसाद रिजालले ११ जनामा संक्रमण देखिएको पुष्टि गर्नुभयो । भारतबाट फर्किरहेका नेपालीमा संक्रमण देखिन थालेपछि सतर्कता बढाइएको छ । आज जिल्ला प्रशासन कार्यालय कैलालीले आदेश जारी गर्ने तयारी पनि गरेको छ । भारतका विभिन्न राज्यमा कोभिड संक्रमण बढेपछि सुदूरपश्चिमका कैलाली र कञ्चनपुरको सीमा नाकामा प्रदेश सरकारले हेल्थ डेस्क स्थापना गरेको छ ।
रोजगारीका लागि भारत गएकाहरू स्वदेश फर्कने क्रम बढेपछि कैलाली मात्र नभएर सुदूरपश्चिममा नै पुनः कोरोना संक्रमण फैलिने जोखिम बढेको छ । फर्किने सबैको नाकामा स्वास्थ्य परीक्षण हुन सकेको छैन । कञ्चनपुरको गड्डाचौकी र कैलालीको त्रिनगर नाकाबाट अहिले दैनिक करिब एक हजारजना नेपाली भित्रिरहेका जिल्ला प्रहरी कार्यालय कञ्चनपुरका प्रवक्ता डिएसपी अमरबहादुर थापाले बताउनु भयो । नाकामा स्वास्थ्य सहायता कक्ष राखिएको भए पनि भारतबाट फर्कने सबैको ज्वरो नाप्ने र कोरोनाका लक्षणहरूबारे बुझ्ने काम भएको छैन । सुदूरपश्चिम प्रदेश स्वास्थ्य निर्देशनालयले प्रदेशका चारवटा नाकामा एन्टिजेन परीक्षणको व्यवस्था गर्न सम्बन्धित स्वास्थ्य कार्यालयहरूलाई परिपत्र गरेको छ । कञ्चनपुरको गड्डाचौकी, कैलालीको त्रिनगर, बैतडीको झुलाघाट र दार्चुलामा स्थापना भएको हेल्थ डेस्कमार्फत एन्टिजेन परीक्षणको व्यवस्था मिलाउन आग्रह गरिएको प्रदेश स्वास्थ्य निर्देशक डा. गुणराज अवस्थीले बताउनु भयो ।









































