काठमाडौँ, शुक्रबार, २६ भाद्र २०७७ । बिश्वब्यापी महामारीको रुपमा फैलिदै गइरहेको कोरना भाइरस (कोभिड-१९ ) का कारण पर्यटक पथ-प्रदर्शक नै बाटो बिहिन हुनु परेको छ ।
पर्यटकलाई बाटो देखाएर गुजारा चलाउँदै आएका पर्यटक पथ-प्रदर्शक अहिले आफ्नै जीवन कुन बाटो अघि बढाउने भनेर अन्योलमा छन् । कोरोनाका कारण पर्यटक आगमन ठप्प भएपछि उनीहरु गन्तव्यहीन बनेका हुन् ।
टुरिष्ट गाईड एशोसिएसन अफ नेपाल (टुर्गान) का अध्यक्ष केदार तामाङ गाइडहरुको समस्या पर्यटन बोर्ड, पर्यटन विभाग र विभागीय मन्त्रीलाई समेत जानकारी गराएको बताउँछन् । उनले काठमाडौं उपत्यका र आसपासमा दुई हजार टुरिस्ट गाइड भएको जानकारी दिए । ‘पर्यटकलाई सहरी संस्कृति र जनजीवनबारे जानकारी दिँदै आएका उनीहरु अहिले मौन छन्,’ तामाङले भने, ‘उनीहरुको समस्या तत्काल समाधान गर्न आवश्यक छ ।’
पर्यटकसँग धार्मिक, सांस्कृतिक, अन्य विविधताबीच सुन्दर एकता रहेको नेपाल भनी चर्चा गर्ने उनीहरुले अहिले एक्लो भएको महसुस गरेको तामाङले सुनाए । ‘गाइड भनेको मुलुकका अवैतनिक सांस्कृतिक दूत पनि हुन्,’ उनले भने, ‘उनीहरुले देखाउने, बताउने र गर्ने व्यवहारबाट संसारले नेपाललाई चिन्ने गर्छ।’
तामाङले गाइडहरुलाई उनीहरुको गाइड लाइन्सेन्स धितो राखेर भए पनि राज्यले कर्जा उपलब्ध गराउनुपर्ने बताए । लामो समयसम्मको बन्दाबन्दीले गाइडहरु पलायन हुने स्थिति आएको र यो समग्र पर्यटन क्षेत्रकै लागि दुर्भाग्यपूर्ण हुने उनको बुझाइ छ ।









































