गोरखा, २ मङ्सिर २०७६ । गोरखाको ब्यापारीक केन्द्र आरुघाट बजार आज बन्द छ । तर, प्रमुख जिल्ला अधिकारी देवेन्द्र लामिछानेले भने अन्तिम तयारी भएकाले बन्द, हड्ताल नगर्न र सहज बतावरण सिर्जना गरिदिन अनुरोध गरेका छन् ।
राष्ट्रिय गौरवको बुढीगण्डकी जलविद्युत आयोजनाले जग्गा रोक्का राखेको तीन वर्ष सम्म मुआब्जा निर्धारण नगरेको भन्दै आक्रोशित स्थानीयले विद्यालय, बजार, बित्तिय संस्था सरकारी कार्यालय सबै बन्द गराएका हुन् ।
‘गोरखाको आरुघाट गाउँपालिका तर्फको बजार र त्रिपुरासुन्दरी गाउँपालिकाको सल्यान्टार तर्फको बजार स्थानीयले स्वस्फूर्त बन्द गरेर मुआब्जा तोक्न दबाव सिर्जना गरेका हुन्’ बुढीगण्डकी जलाशययुक्त सरोकार समिति गोरखा आरुघाट, बिसालटार धादीङका संयोजक निदेश ढकालले भने । आज राजनीतिक दल, गाउँपालिकाका प्रमुख, वडा अध्यक्षहरु सहित स्थानीयको भेलाले भोलीबाट थप आन्दोलनको कार्यक्रम घोषणा गरेर अघि बढ्ने निर्णय गर्ने तयारी भएको ढकालले बताए । आरुघाट क्षेत्रको गोरखा र धादीङ तर्फका स्थानीय बजार ठप्प बनाएर घरेलुचौरमा भेला भएका छन् ।
यस अघि पटक–पटक मुआब्जा तोक्ने अन्तिम तयारी भएको बताउँदै निर्धारण समितिका अध्यक्ष प्रमुख जिल्ला अधिकारी देबेन्द्र लामिछाने, आयोजना प्रमुख कृष्ण कार्कीले ढाँटेको आरोप स्थानीयको छ । लामो समय घर जग्गा रोक्का हुँदा किनबेच गर्न, ब्यापारी प्रयोजनका लागि बैकमा राख्न नपाएको गुनासो स्थानीयको छ ।









































