टोकियो । भोटेकोशी बाढीबाट प्रभावित नागरिकको राहत तथा उद्धारका लागि जापानमा रहेको डिपवे जापान कम्पनी प्रालिले ३६ लाख जापानी येन सहयोग प्रदान गरेको छ।
कम्पनीका अध्यक्ष एवं प्रबन्ध निर्देशक दीपक सुवेदीका अनुसार डिपवे जापान कम्पनीका तर्फबाट ३० लाख येन तथा कम्पनी परिवारका तर्फबाट ६ लाख येन गरी कुल ३६ लाख येन प्रधानमन्त्री दैवी प्रकोप उद्धार कोषमा सहयोग गरिएको हो।
श्रीकृष्ण जन्माष्टमीको अवसरमा सहयोगको घोषणा गर्दै कम्पनीले बाढीपहिरोमा परी ज्यान गुमाउनेहरूप्रति श्रद्धाञ्जली तथा प्रभावित परिवारप्रति गहिरो समवेदना व्यक्त गरेको छ।
विपत्तिको समयमा पीडित नागरिकलाई राहत पुर्याउन सबैले आफ्नो स्थानबाट सक्दो सहयोग गर्नुपर्नेमा जोड दिँदै अध्यक्ष सुवेदीले पीडितप्रति करुणा, सहयोग र एकताको भावना प्रदर्शन गर्न सबैमा आग्रह गरेका छन्।
विदेशमा रहेर पनि मातृभूमिमा परेको विपत्तिमा ठूलो आर्थिक सहयोग गर्दै दीपक सुवेदी र डिपवे जापान परिवारले मानवीय सेवाको उदाहरण प्रस्तुत गरेका छन्।
३६ लाख येनको यो सहयोगले भोटेकोशी बाढीपीडितप्रति जापानमा रहेका नेपालीको मानवीय संवेदना र सामाजिक उत्तरदायित्वलाई समेत प्रतिबिम्बित गरेको छ।







































