बलेवा सेवा समाज जापानद्वारा श्रीकृष्ण जन्माष्टमी विशेष कार्यक्रम आयोजना गर्ने भएको छ।
टोकियो (जापान) — बलेवा सेवा समाज जापानले श्रीकृष्ण जन्माष्टमीको पावन अवसरमा विशेष धार्मिक तथा सामाजिक कार्यक्रम आयोजना गर्ने भएको छ।
समाजले सेप्टेम्बर ४, २०२६ (शुक्रबार) अपराह्न ३:०० बजेदेखि सिन–ओकुबोस्थित सोलमारी मुरा हलमा श्रीकृष्ण जन्माष्टमी विशेष प्रवचन तथा भजन कार्यक्रम आयोजना गर्न लागेको जनाएको हो।
आयोजकका अनुसार भगवान् श्रीकृष्णले दिनुभएको सत्य, कर्म र मानवताको सन्देशलाई प्रवाह गर्दै नेपाली समुदायबीच धार्मिक, सांस्कृतिक तथा सामाजिक एकता अभिवृद्धि गर्ने उद्देश्यले कार्यक्रम आयोजना गरिएको हो।
कार्यक्रमसँगै मानव सेवा आश्रम सहयोग अभियानलाई समेत सफल बनाउन स्वेच्छिक आर्थिक सहयोग संकलन गरिने जनाइएको छ। समाजले जापानमा रहेका सम्पूर्ण नेपाली समुदायलाई कार्यक्रममा सहभागी भई धार्मिक तथा सामाजिक अभियानलाई सफल बनाउन आग्रह गरेको छ।
बलेवा सेवा समाज जापानका अध्यक्ष सुरेन्द्र पौडेल ‘प्रेम’का अनुसार कार्यक्रममा प्रवचन, भजन–कीर्तन तथा सामूहिक भेटघाटको समेत व्यवस्था गरिएको छ।
समाजले विभिन्न संघ–संस्था, पत्रकार तथा समुदायका प्रतिनिधिहरूलाई कार्यक्रममा उपस्थितिका लागि निमन्त्रणासमेत पठाएको छ।






































