चितवन, शनिबार, १९ असार २०७८ । चितवनको रत्ननगर नगरपालिकाले काखको ‘बच्चा दुई वर्ष नहुँदै आमा, बुबा, सासु आमा र ससुरालाई जिम्मा लगाएर विदेश जान महिलालाई अनुमति नदिने प्रस्ताव पारित गरेको छ । नगरपालिकाको नवौं नगरसभा बजेट, नीति तथा कार्यक्रमसहित १७ वटा प्रस्ताव पारित गरिएको हो ।
यही असार ६ गते शुरु नगरसभाअन्तर्गत विभिन्न चरणमा बजेट, नीति तथा कार्यक्रम सहित महत्वपूर्ण प्रस्तावहरुमा छलफल गरी समापन गरिएको हो ।
नगरपालिकाले आर्थिक वर्ष २०७८/७९ को लागि एक अर्ब २६ करोडको बजेट पारित गरेको छ । नीति तथा कार्यक्रम अन्तर्गत १४ वटा नगरका र १३ वटा लागत साझेदारी गौरवको योजना समेत पारित गरेको छ ।
बच्चा दुई वर्ष नहुँदै विदेश जान महिलालाई अनुमति नदिनेसहित १७ बुँदे महत्वपूर्ण प्रस्ताव पारित गरेको नगरसभाले बालविवाह, सडक मानवमुक्त नगरपालिका घोषणा गर्ने, जन्म, मृत्यु, विवाह, सम्बन्ध विच्छेद र बसाइ सराइ तोकिएको समय भित्र गरी पञ्जिकरणलाई व्यवस्थित गर्ने, नगरभित्र जग्गा प्लटिङ गरी घडेरी व्यवस्थापन गर्ने व्यक्ति वा संस्थाले नगरपालिकाबाट पूर्वअनुमती लिनुपर्ने प्रस्ताव पारित गरेको हो ।
यस्तै, अन्य प्रस्तावहरुमा सामुदायिक विद्यालय व्यवस्थापन समितिका पदाधिकारी र शिक्षकहरुले आफ्ना छोराछोरीलाई अनिवार्य सामुदायिक विद्यालयमा पढाउनुपर्ने, नगरसभाबाट पारित भएको बजेट शीर्षक र रकम सभाको अनुमतिमा मात्र शीर्षकान्तर गर्ने, पर्यटन प्रहरीको भवन निर्माण गर्न डेढ कठ्ठा जग्गा उपलब्ध गराउने प्रस्ताव पारित गरिएको नगरप्रमुख नारायण वनले जानकारी दिए ।









































