रुकुमपश्चिम, ६ माघ २०७७ । राडी बजारमा कांग्रेस र नेकपा (प्रचण्ड–माधव) समूहका कार्यकर्ताबीच झडप भएको छ । दिनभरजसो झडप भएपछि अप्रिय घटना हुन नदिन स्थानीय प्रशासनले अनिश्चितकालीन निषेधाज्ञा जारी गरेको छ ।
आठबीसकोट नगरपालिकाको ९ नम्बर वडा राडीबजारमा नेकपा र कांग्रेस कार्यकर्ताबीच दिनभर झडप हुँदा तनावको स्थिति सिर्जना भएको छ ।
प्रमुख जिल्ला अधिकारी बद्रीनाथ गैरेले चार किल्ला तोकेर निषेधाज्ञा आदेश जारी गरेका छन् । पूर्वमा घारीखोला, पश्चिमा ठूलीभेरी, दक्षिणमा सिमबजार र उत्तरमा दाँजे क्षेत्रबाट राडीबजार प्रवेशमा रोक लगाएको छ ।
मंगलबार दिनभर राडी बजार क्षेत्रमा झडप भएपछि स्थिति नियन्त्रणमा लिन प्रहरीले नौं राउण्ड हवाई फायर समेत गरेको थियो ।



















