गोरखा, शनिबार, ३१ साउन २०७७ । गोरखाको पालुङटार नगरपालिकाले भोली (आईतवार) देखि लागु हुने गरी पालिका क्षेत्र भित्र लकडाउन गरेको छ ।
पालुङटार नगरपालिका वडा नम्बर ४ का एक ब्यक्ति बिरामी भएर चेकजाँचका लागि भरतपुर जाँदा अस्पतालले गरेको पिसिआर जाँचका क्रममा कोरोना पोजेटिभ देखिएपछि लकडाउन गरिएको हो । यस अघि कृषि बिकास बैंक पालुङटार शाखामा पोखराबाट पैसा पु¥याउन आएका बैङ्कका कर्मचारीमा पोखरामा पिसिआर जाँच जर्दा पोजेटिभ देखिएपछि समुदायमा कोरोना पुग्न सक्ने खतरा रहेको भन्दै नगरपालिकाले लकडाउन गरेको जनाएको छ ।
‘छिमेकी पालिका तनहुँको भानुमा धेरै जनामा कोरोना देखियो’ पालुङटार नगरपालिकाकी उपप्रमुख पम्फा बसेलले भन्नुभयो ‘नगरपालिका भित्रका एक र यहाँ आएर फर्केका एक जनामा पनि कोरोना देखिएपछि धेरै जनाको घुलमिल भएको हुन सक्ने भएकाले लकडाउन गर्ने निर्णय भएको हो ।’ नगरपालिकामा आज बसेको बैठकले आइतवार (३२ गते ) देखि लकडाउन गर्ने निर्णय गरिएको हो ।
बिरामी, शव लिएर आउजाउ गर्ने साधन, स्वास्थ्यकर्मी, सुरक्षाकर्मी बाहेकलाई बिना काममा नहिड्न नगरपालिकाले आग्रह गरेको छ । ‘अत्याबश्यक काममा हिड्नेले पनि मास्क अनिवार्य लगाउनुपर्छ, मास्क नलगाउनेलाई २० रुपैयाँ जरिबाना गर्ने निर्णय गरेका छौँ’ उपप्रमुख बसेलले भन्नुभयो । मास्क लगाए नलगाएको प्रहरीले अनुगमन गर्नेछ ।
त्यसैगरी, अत्याबश्यक काममा जानु परेमा पाँच जना भन्दा धेरै जान नपाउने, समुहमा हिड्ने, बस्ने मेलापात नगर्न समेत नगरपालिकाले अनुरोध गरेको छ ।









































