गोरखा, २० चैत २०७६ । गोरखामा अहिलेसम्म ६ जना सामुहिक क्वारेन्टाइनमा र २४४ जना होम क्वारेन्टाइनमा रहेका छन् । भारतबाट आएका चार र नेपालकै गुल्मी जिल्लाबाट आएका दुई जनालाई सामुहिक क्वारेन्टाइनमा राखिएको अरु सबैलाई होमक्वारेन्टाइनमा राखिएको छ ।
भारतबाट उद्धार गरी ल्याइएका तीनजनालाई शहीद लखन गाउँपालिका -२ आरुबोटस्थित बालज्योति आधारभूत विद्यालयमा राखिएको गाउँपालिकाका अध्यक्ष रमेश थापा मगरले जानकारी दिए । उनीहरुलाई घरमै खाना बनाई ल्याएर खुवाउने गरिएको उनले बताए ।
त्यस्तै बारपाक सुलीकोट २ बारपाक गाउँमा भारतबाट आएका एक जनालाई स्थानीय स्वाथ्यचौकीमा बनाइएको क्वारेन्टाइनमा राखिएको वडाअध्यक्ष लालबहादुर गुरुङले जानकारी दिए । उनलाई खाने र सुत्ने प्रबन्ध सोही स्वास्थ्यचौकीमा गरिएको छ ।
गुल्मीबाट फर्केका दुई जनालाई धार्चे ३ उहियाँमा रहेको पार्वती आधारभूत विद्यालयमा क्वारेन्टाइनमा राखिएको वडा अध्यक्ष इन्द्रप्रसाद गुरुङले जानकारी दिए ।
उहियाँको चारै दिशामा युवाहरु ड्युटी बसी प्रवेश निषेध गरिएको छ। तर गाउँकै चेलीहरु आएपछि उनीहरुलाई सामुहिक क्वारेन्टाइनमा राख्ने गरी प्रवेश गराइएको गुरुङले बताए ।
गोरखामा विदेशबाट आउनेको संख्या २४६ पुगेको छ। चार जनाबाहेक उनीहरु सबै सेल्फक्वारेन्टाइनमा नै छन् ।
सामुहिक क्वारेन्टाइनमा रहनु गोरखाका लागि सुखद पक्ष रहेको क्वारेन्टाइन निर्माण गरेको रणसिँह दल गणका गणपति उज्वल केशी बताउँछन्। ‘क्वारेन्टाइनमा राख्नुपर्ने शंकास्पद बिरामी नहुनु भनेको सुखद पक्ष हो’, उनले भने ।
नेपाली सेनाले गोरखा नगरपालिकामा ५० बेडको र पालुङटार नगरपालिकामा १९ बेडको क्वारेन्टाइन निर्माण गरेको छ । अन्य गाउँपालिकाहरुले पनि विद्यालय तथा अन्य सामुहिक भवनहरुमा सामुहिक क्वारेन्टाइन बनाएका छन् ।









































