गोरखा, २६ माघ २०७६ । गण्डकी प्रदेश प्रहरी प्रमुख प्रहरी नायव महानिरीक्षक बिनोद शर्मा घिमिरेले गोरखा जिल्लाको पालुङटार नगरपालिका-६ गाईखुर पौवाटार स्थित स्थापना गरीएको अस्थाई प्रहरी पोष्ट पौवाटार गोरखाको यही माघ २४ गते एक कार्यक्रमका बिच उदघाटन गर्नु भएको छ ।

उद्घाटन पश्चात कार्यक्रमलाई सम्बोधन गर्दै उहाँले वर्तमान समयमा नेपाल प्रहरीले समुदाय प्रहरी साझेदारी अवधारण अन्तर्गत जनतासँग हातेमालो गरी सभ्य र सु-संस्कृत समाज निर्माणका लागि जनताको घर-घरमा पुगिरहेको बताउँदै अब शान्तिपूर्ण एवं सुरक्षित समाज निर्माणका लागि आम नागरिकले प्रहरीलाई सहयोग गर्नुपर्ने कुरा बताउनुभयो ।

कार्यक्रमका अध्यक्ष समेत रहनुभएका पालुङ्टार नगरपालिकाका प्रमुख दिपकबाबु कंडेलले विकृती विसंगती रहित समाज निर्माण गर्न स्थानीय तह प्रहरी प्रसाशनसंग मिलेर काम गर्न प्रतिबद्ध रहेको कुरा व्यक्त गर्नुभयो ।

उक्त कार्यक्रममा जिल्ला प्रहरी कार्यालय गोरखाका प्रमुख प्रहरी उपरीक्षक ओम प्रसाद अधिकारी, स्थानीय जनप्रतिनिधिहरु, विभिन्न संस्थाका प्रतिनिधिहरु, युवा क्लबका प्रतिनिधि, पत्रकार लगायत स्थानीय भद्रभलाद्मीहरुको उपस्थिति रहेको थियो ।









































