गोरखा, १० पौष २०७६ । गोरखाबाट काठमाण्डौका लागि आजदेखि रात्रीबस सेवा सञ्चालनमा आएको छ ।
गोरखाको सोतीदेखि काठमाण्डौ र काठमाण्डौबाट सोतीसम्म दरौदी यातायात प्रा.लिले रात्री बससेवा शुरु गरेको प्रा.लिका अध्यक्ष ज्ञानेन्द्र श्रेष्ठले जानकारी दिनुभयो ।
‘अहिलका लागि सोतीबाट साँझ ६ बजे काठमाण्डौका लागि बस छुट्ने छ भने काठमाण्डौबाट सोतीका लागि साँझ ७ बजे बस छुट्ने व्यबस्था मिलाएका छौ ।’ उहाँले भन्नुभयो ।
सोतीबाट छुट्ने बस आरुघाट–ध्याम्पेसाल, आहाले गोरखा बजार हुदै काठमाण्डौ पुग्ने अध्यक्ष श्रेष्ठले जानकारी दिनुभयो । ‘साँझ छुटेको बस बिहान करिब ५ बजे काठमाण्डौ पुग्नेछ, उहाँले भन्नुभयो, काठमाण्डौबाट छुटेको बस सोही समयमा सोती आइपुग्ने गरि सञ्चालनको व्यवस्था गरिएको छ ।’ सोतीबाट काठमाण्डौका लागि छुटेको बस राती १० ÷११ बजे गोरखा सदरमुकामसम्म आइपुग्ने उहाँको भनाई छ ।
उक्त सेवा लिने यात्रुहरुका लागि सोतीदेखि काठमाण्डौ सम्मको भाडा रु ७ सय २० तोकिएको अध्यक्ष श्रेष्ठले जानकारी दिनुभयो । हाल गोरखा सदरमुकामबाट काठमाण्डौका लागि बिहान पौने ६ बजेदखि दिउँसो ३ बजेसम्म मात्र सार्वजनिक सवारी साधन छुट्ने गरेको थियो ।









































