गोरखा, ११ असोज २०७६ । गोरखाका अलैंची किसान अलैंची खेतीबारे थप ज्ञान लिन लमजुङका छिनखोला पुगेका छन् । अलैंची खेतीबाट राम्रो आम्दानी गर्न सकिने भएपछि गोरखाका ३५ जना कृषक अलैंची खेतीबारे बुझ्न छिनखोला पुगेका हुन्
गोरखाको भिमसेन थापा गाउँपालिका र आरुघाट गाउँपालिकाका कृषकको चार समुहले अलैंचीबारीको स्थलगत अवलोकन गरी त्यसबारे जानकारी लिएको नेपाल अलैंची व्यवसायी महासंघ गण्डकी प्रदेशका अध्यक्ष अजय तामाङले बताए । थोरै–थोरै अलैंची रोपेका, अलैंची रोप्ने चाहना भएका र अलैंचीको बारेमा जान्ने रुचि भएका कृषकहरुले अलौंचीबारेमा विविध जानकारी लिएको उनी बताउँछन् ।
अलैंची खेतीको अवस्था, पृष्ठभूमि, परिचय, वनस्पातिक विवरण, खेतीको उपयोगिता र महत्व, यसका प्रचलित प्रजातिको चिनारी, प्रसारण विधि, नर्सरी व्यवस्थापन, विरुवा रोपण, स्याहार, रोग किरा नियन्त्रण, उत्पादन र त्यसपछिका कार्यहरु, बजारीकरण लगायतका विषयमा सामुहिक रुपमा जानकारी दिएको उनले बताए ।
अलंैचीखेती बारे जानकारी पाएपछि आफुलाई व्यवसायिक रुपमा अलैंची उत्पादन गर्न ठूलो सहयोग मिल्ने गोरखा भिमसेन गाउँपालिकाका मिना गुरुङ बताउँछन् । उनी भन्छीन्, कतिबेला अलैंचीको कस्तो स्याहार सुसार गर्ने, गोडमेल, मलखाद र छहारीको व्यवस्था, टिप्ने र सुकाउने जस्ता प्रकृयामा आफुहरु लाई ज्ञान भएन त्यसैले अलैंची खेतीबारे ज्ञान लिन लमजुङ आएका हौ ।
छिनखोलाका ८० प्रतिशत किसान अलैंची खेतीमा लागेका छन् । ओसिलो जमिन भएकोले छिनखोला अलैंचीको प्रमुख क्षेत्रको रुपमा स्थापित भएको प्रधानमन्त्री कृषि आधुनिकिकरण परियोजना अलैंची जोनका प्रमुख ईशवरी प्रसाद न्यौपाने बताउँछन् । छिनखोला अलैंचीको पकेट क्षेत्रको रुपमा स्थापित भएको छ ।









































