जापान , ९ साउन २०७६ । गैरआवासीय नेपाली संघ (एनआरएनए) का अध्यक्ष भवन भट्टले आफूले आगामी कार्यकालका लागि चुनाव नलड्ने अग्रिम घोषणा गर्नु भएको छ ।
बिहीबार मध्यरात एक विशेष सम्बोधन गर्दै भट्टले आफूले अर्को कार्यकालका लागि चुनाव नलड्ने घोषणा गर्नु भयो ।
आगामी कार्यकालका लागि भट्टले चुनाव लड्ने या नलड्ने भन्नेबारे एनआरएनभित्र चासो बढिरहेको बेला उहाले चुनाव नलड्ने घोषणा गर्नु भएको थियो ।
यद्यपि उहाले नयाँ नेतृत्वका लागि कसलाई सघाउने भन्नेबारे चाहिँ केही खुलाउनु भएको छैन । यसअघि भट्ट अध्यक्ष बन्दा उपाध्यक्ष कुमार पन्तलाई अर्को कार्यकालमा सघाउने भन्ने भद्र सहमति भएको भनिएको बेला भट्टले चुनाव नलड्ने घोषणा गर्नुलाई अर्थपूर्ण रुपमा हेरिएको छ । अहिले अध्यक्षको दौेडमा सबैभन्दा अघि पन्त रहेका छन् ।
‘सबैको भवन भट्ट अबको चुनावमा उठ्ला भन्ने प्रश्न छ, एनआरएनमा मैले धेरै मायाँ पाएको छु । म भाग्यमानी छु । मैले एनआरएनमा कमाएको पनि यही मायाँ हो । मेरो शुभेच्छुकको समर्थकको मायालाई म सम्मान गर्छु । अबको चुनाव लड्दिनँ’, सम्बोधनका क्रममा भट्टले भन्नु भयो ।
आफूले स्वतस्फूर्त र एक संस्कार निर्माणका लागि यो निर्णय लिएको भन्दै भट्टले पावर र लोभी संस्कारलाई चिर्नु जरुरी रहेको बताउनु भयो ।
‘के अध्यक्षमात्रै टप लिडरसिप हो त ? यहाँ कैयन भवनहरुले अवसर पाउन सक्नु पर्छ । परिवार, लोभ, मोहबाट माथि उठ्न हामीले सिक्नुपर्छ ’ भट्टले भन्नु भयो, ‘मैले त्यो अन्त्य गरेको छु । धेरै साथीहरुले निरन्तरतामा जोड दिँदादिँदै मैले यो एउटा उदाहरण पेश गरेको छु ।’
‘ मैले गरेको गरेको यो निर्णलाई साथीहरुले स्वीकार गर्नुहुन्छ भन्ने ठानेको छु’ उहाले थप्नु भयो ।
आफू एनआरएनबाट रिटायर्ड भएको नभई चालक बस्ने सिटबाट पछाडि हटेको मात्रै । ‘न म रिटायर्ड भएको हुँ, बरु म झन् सक्रिय भएर लाग्नेछु । एनआरएनसँग सम्बन्धित मामलामा सँधै सँगै रहनेछु’ उहाले भन्नु भयो ।
‘एनआरएनए मेरो मुटुमा छ, म एनआरएनसँगै धड्किन्छु । एनआरएनए मेरो नेपाल बाहिरको नेपाल हो । एनआएन मेरो रगत रगतमा छ जीवनपर्यन्त रहन्छ । म चालकको सिटबाट पछडि सरेको मात्रै हो । बसबाट निस्केको छैन । म साहसपूर्ण नेतृत्वको खोजीमा छु ।’ भाबुक हुदै भट्टले भन्नुभयो ।
एनआरएनलाई कसैले दायाँबायाँ गर्न खोजे आफू चुप लागेर नबस्ने पनि भट्टले बताउनु भयो ।
आफ्नो दुई वर्षे कार्यकालमा सहयोग गर्ने सबै सञ्चारकर्मी, संघसंस्था, नेपाल सरकार, रराजनीतिक दललगायतलाई सम्पूर्ण महानुभाबहरुमा धन्यबाद ब्यक्त गर्नु भयो ।





































