जापान, भाद्र १, २०७५ । ‘शास्त्र हराए संस्कृति हराउँछ, संस्कृति हराए संस्कार हराउछ, संस्कार हराए मान्छे हराउछ’ भन्ने मुल नाराका साथ जापानमा हुन लागेको २२ औ रोधी साँस्कृतिक साँझको तयारी पूरा भएको छ ।
प्रवासी तमुहरुको साझा संस्था तमुधीं जापानको आयोजनामा हुन लागेको रोधी साँस्कृतिक साँझ-२०१८ को तयारी पुरा भएको हो ।
तमु धिं जापान अध्यक्ष अनिता गुरुङले साँस्कृतिक कार्यक्रमको सम्पूर्ण तयारी पूरा भएको जानकारी दिनुभयो । रोधीं साँझ यही भदौ ३ गते (अगस्ट १९) आईतबारका दिन टोकियोको ‘मेगुरो कुमिन सेन्टर’ मा हुँदैछ ।
अध्यक्ष गुरुङका अनुसार साँस्कृतिक कार्यक्रममा नेपालबाट आमन्त्रित तथा स्थानीय ख्याति प्राप्त कलाकाहरुको प्रदर्शन रहने छ । रोधी साँझलाई धमाकेदार एवं मनोरजनात्मक बनाउन तमु धिं जापानले यसपाली नेपाली सांगितिक क्षेत्रका चर्चित गायिक मेलिना राई, लोकदोहोरी गायिका कृष्णा गुरुङको सहभागिता रहनेछ ।
त्यसैगरी कार्यक्रममा लोकदोहोरी क्षेत्रमा ख्याती कमाएका चर्चित लोक गायिका कृष्णा गुरुङ, लोक तथा पप गायक खेम गुरुङ, अमर गुरुङलगायतका स्थानीय कलाकाहरुको समेत प्रस्तुति रहनेछ । कार्यक्रमलाई थप मनोरन्जनात्मक बनाउन थुप्रै बाल तथा प्रौड कलाकारहरुको सहभागिता रहने कार्यक्रम संयोजक अमर गुरुङले जानकारी दिनुभयो ।
विदेशी भूमिमा रहेर आफ्नो कला, भाषा, भेषभुषा संस्कार र संस्कृतिलाई जीवन्त दिदै आएको तमु धिं जापानले हरेक बर्ष रोधी र अर्को ठुलो सांस्कृतिक चाड लोसारमा विभिन्न कार्यक्रमको आयोजना गर्दै आएको छ ।
