अनशन बसेका रुसी सेनाका परिवार प्रहरी नियन्त्रणमा

आमरण अनशन बसेका रुसी सेनाका परिवारलाई प्रहरीले नियन्त्रणमा लिएको छ ।

रुसी सेनामा गएका नेपालीको जीवन रक्षाको माग गर्दै अनशन बसेको सातौं दिन बिहीबार प्रहरीले उनीहरूलाई भृकुटीमण्डपबाट नियन्त्रणमा लिएको हो

प्रहरीले तीन जना बच्चासहित १२ जनालाई नियन्त्रणमा लिएर सिंहदरबार प्रहरी वृतमा राखेको रुसी सेनामा आवद्ध नेपालीको जीवन रक्षार्थ अभियानकी अभियन्ता कृतु भण्डारीले बताइन् ।

रुसी सेनामा भर्ना भएकाहरूको १८ जना आफन्त भृकुटीमण्डपमा आमरण अनशन बसिरहेका थिए । उनीहरूले आज दिउँसो रुसी सेनामा गएका नागरिकहरूको जीवन रक्षाको माग गर्दै रसियन राजदूतावास अगाडि धर्ना दिने तयारी गरेका थिए ।

भण्डारीले शान्तिपूर्ण ढंगले अनशन बसिरहेका बेला प्रहरीले जबरजस्ती नियन्त्रणमा लिएको बताइन् ।