फागुन २० गते नेपालको राजनीतिका एक अग्लो धरोहर, नेपालको पहिलो संसद, पहिलो सभामुख तथा बहुदलीय ब्यबस्था पुनर्स्थापनाका पहिलो तथा २९ औं प्रधानमन्त्री श्री कृष्णप्रसाद भट्टराई ( किसुनजी ) को आठौ स्मृति दिवस ।
संसारिकतामा नफसेको, आध्यात्मका गम्भीर उपासक, निर्दाग चरीत्र, हठी स्वभाव र आमोद-प्रमोदमा कुशाग्र किसुनजीमा रत्तिभर कुनै लोभ, ब्यक्तिगत मोह र सुख सयल गरुँ भन्ने भावना थिएन ।
यिनी बि.सं. २००३ सालमा नेपाली कांग्रेस गठन गर्दादेखि नै नेपालको राजनीतिमा संलग्न थिए । २००७ सालमा नेपाली कांग्रेसको नेतृत्वमा चलेको सशस्त्र क्रान्तिमा जनकपुर- उदयपुर कब्जा गर्ने मुक्तिसेनाको कुशल नेतृत्व सम्हालेका भट्टराईले बि.सं. २०१५ सालमा संसद र प्रतिनिधि-सभाका सभामुखको नेतृत्वदायी भूमिका समेत निर्वाह गरेका थिए ।
किसुनजी जीवनभर गान्धीवादी सन्त नेताको रूपमा पहिचान बनाए ।
सधैं-
– दृढ अठोट
– स्पष्टबक्ता
– सैद्धान्तिक निष्ठा र
– हरदम प्रफुल्ल रहने
‘सेन्स अफ ह्युमर’ किसुनजीमा उच्च रहेको थियो । पदमा रहदा कुनै प्रकारको ब्यक्तिगत लाभ तथा विवादमा नमुछिएका कारण यिनीलाई स्वच्छ छवि एबम कुशल नेतृत्वका विराट राजनेताका रूपमा लिनेगरिएको छ ।
२०१७ पौष १ गतेका दिन थापाथलीमा सम्पन्न हुँदैगरेको तरुण दलको कार्यक्रमबाट तात्कालिक प्रधानमन्त्री बी.पी. कोइरालासंगै भट्टराईलाई पनि राजा महेन्द्रले गिरफ्तार गरेर १० बर्ष जेल हालिदिए । भट्टराईले पटक पटक गरेर १४ बर्ष जेलजीवन विताउनु भयो । २०३४ को पटना सम्मेलनबाट बी.पी. कोइरालाले स्वास्थका कारण देखाएर भट्टराईलाई कार्यवाहक सभापति बनाइदिए ।
कांग्रेसमा झन्डै डेढदशक कार्यवाहक सभापति बनेका भट्टराई बी. पी. कोइरालाको निधनपछि पनि कार्यवाहक सभापतिनै रहे । २०४८ सालमा भएको कांग्रेस महाधिवेशनले भट्टराईलाई सर्बसम्मत सभापतिमा निर्वाचित गर्यो त्यपछि २०५३ सम्म किशुनजी कांग्रेस सभापतिका रूपमा रहे ।
नेपाली कांग्रेसको विशिष्ट राजनीतिक निष्ठाले ओतप्रोत किशुनजी कहिल्यै कोहीकसैसंग टसमस गर्नु परेन । कांग्रेसको “संबैधानिक राजतन्त्र” प्रतिको अटल निष्ठामा रहेका भट्टराई गणतन्त्रको स्थापनापछि भने मौन बसिदिनु भयो । अहिंसात्मक आन्दोलनबाट नै प्रजातन्त्र स्थापना गर्न सकिन्छ भन्ने दृढ अठोट र संकल्प बोकेका भट्टराईको २०६७ फागुन २० गते शुक्रबार राती निधन भएको थियोे ।
जीवनमा थुप्रै राजनीतिक आरोह- अबरोह झेल्नुपरेका किशुनजी प्रजातन्त्र र लोकतन्त्रका दर्बिला सिपाही हुनुहुन्थ्यो ।
बर्तमानमा राजनीतिले जनबिश्वास गुमाउँदै गएको यो अबस्थामा राजनीतिक त्याग, निस्वार्थ, इमानदारीता र निष्ठाका पर्याय किशुनजीसंग धेरै कुरा अनुशरण गर्न सकिन्छ ।
आजका दिनसम्म आइपुग्दा कांग्रेसले यस्तो दुर्दिनहरुबाट गुज्रिनु परेको छ । कांग्रेस जनताको बिश्वासमा अडेको पार्टी, जातीय सद्भाव, समभाव र निरन्तर जनताको समृद्धिको सपना बोकेर हिंडेकाे पार्टी, नेतृत्वको अदुरदर्शिताका कारण यो हालतमा आइपुग्दा निस्वार्थ भावले कांग्रेसको प्रवाहमा लाग्नेहरुको मन कति कुडिँदाे हो !
आजको कांग्रेसले किशुनजीसंग धेरै कुरा सिक्नु पर्छ । जनतामा कांग्रेस बिरोधि भावना कसरी पैदा भयो ? हामी कहाँनेर चुक्यौ भन्ने हेक्का नेतृत्वले लिने कि नलिने ? कतै हामी नेपाली कांग्रेसका नेताहरु बी.पी. कोइराला, सुबर्ण शमशेर, गणेशमानसिंह, कृष्णप्रसाद भट्टराई, सि.के. प्रसाईं, महेन्द्रनारायण निधि, भीमबहादुर तामाङले अबलम्बन गरेको बाटाेबाट अलग त भएनौ ? यो हेक्का नेपाली कांग्रेसका सम्पुर्ण तहका नेतृत्वले आत्मसात गर्नुपर्छ । नेतृत्वमा चरम गुटबन्दी, व्यबिचार, ढाेंगी चरित्र, नातावाद र लम्पसारवादको एेंजेरुनै कांग्रेस पराजयको मुल कारण हो ।
आज हामीसामु भौतिक रूपमा कृष्णप्रसाद भट्टराई त हुनुहुन्न यद्यपि उहाँले छोडेर जानुभएको राजनीतिक संस्कार छ । उहाँले जीवनभर पालन गर्नु भएको निष्ठाको राजनीतिक संस्कार थोरै मात्र अनुसरण गर्नसके पनि उहाँप्रति सच्चा श्रद्धाञ्जलि हुनेछ ।by Om Panday

जानकारीको लागी तल फोटोमा किल्क गर्नु होला ,सुमेघ ट्राभल्स्